ZALEN April 29, 2026 : Nimin tlai dar 5:15 vel khan Khawiva atanga Lungsen-a power pekna 132kv line banpui, Hauruang khaw bula mi chu a tlu a, hei vang hian Lungsen Power Sub-Station in a chawm Lungsen, Tlabung, Chawngte, Borapansury leh Bungtlang 'S' Sub-Station ten power supply an hmu theilo.

Hauruang bula 132kv line tower tlu ta hi a kilhna leh a supporter-te a bo nasat avanga tlu a nih ber thu thawktu ten an sawi.

Lungsen power Sub-Division a thawktute chuan, tun hma pawhin a nutball leh supporter te chu ruk bo a lo ni tawh thin, siam that reng ni mah se, inven sen a nih loh thu sawiin hetiang chhiatna hi a thleng ta a ni tih an sawi a, power supply hi pangngai taka pe leh tur chuan hmanraw neihsa pawh awm mah se, kar 3-4 leh cheng nuai 10 vel tal a ngai tih an sawi bawk. 

Lungsen Power Sub-Division a thawktute chuan, rang taka power supply pek a nih theih nan ngaihtuahna an sen thu sawiin tower thar a awm hma a power supply kan dawn theih nan a theih ang anga hma an lak thu an sawi bawk.

Vawiina electric department hnathawkte hi Lungsen North Branch YMA chuan puiin, a tahtawlin YMA Branch hrang hrang pawh an pun tur thu an sawi a, YMA Branch hrang hrangte an mahni pui tura an in kau reng chu lawmawm an tih thu an sawi bawk.