ZALEN April 17, 2026: ZPM Corporator hlui Malsawmzuala Ralte chuan 2025-26 khan Ward Development Fund Corporator tin ten nuai 68 theuh an dawn tur atangin nuai 28 chiah an dawng a, nuai 40 pek kim an nih loh thu a sawi.

Vawiina chanchinthar lakhawmtute an kawmnaah Malsawmzuala chuan, "Nikum 2025-26 AMC budget estimates-ah khan Corporator Ward development fund atana dah chu Nuai 1292 a ni a, Corporator tinin Nuai 68 theuha kan dawn tur a ni. Hetah hian Property tax khawn atanga lo let leh property tax return pawh chhiar tel a ni.

Kum kan han hmang chhova, Property tax return atangin Nuai 15 leh Nuai 3 discretion, avaiin Nuai 18 kan dawng a, general ward fund Nuai 10 kan dawng bawk a, tichuan Nuai 68 atangin Rs. Nuai 28 chiah kan dawng ta a ni. Corporator ward development fund Rs. Nuai 40- min pe kim lovin MNF AMC sawrkar kha a liam a ni," a ti.

Malsawmzuala chuan, "Hetih rual hian budget estimates-a head hrang hranga hnathawhna tura dah belhkhawm chu Rs. Vaibelchhe 38.85 zet a ni. Hei erawh MNF AMC sawrkar thuneitu ten an duhsak zawng leh tul an tihna apianga an hman, opposition corporator ten kan va beisei ve theih lem loh a ni. Corporator ten kan ward a veng hrang hrang mamawh, hmasawnna hnathawh tur thawh sen loh kan nei ve teuh a, chumi atana kan ban phak ve chhun Ward development fund pawh min pek kim theih loh laiin an mi leh sa, an duhsak zawng te vulhna tur sum erawh an pe chhuak reng a ni.

AMC kalphung angin kan ward chhunga hnathawh tur lo chhuak, work order copy kan dawn ve zel avangin, an sum hmanna kan hre ve zel a. Ward 18-ah ringawt hian MNF mi leh sa an duhsak zawng hna 63-zet an pe a, work order atanga an sum hman zat belhkhawm chu Rs. 1,60,00,000 (Vaibelchhe khat leh nuai sawmruk) vel zet a ni," a ti bawk.