ZALEN Febuary 2, 2026: ZPM Party chuan vawiin khan an party office-ah chhung inkhawm an hmang a, Agriculture & Farmers Welfare Minister PC Vanlalruata chuan thu sawiin, ‘Central-ah Budget thar an puang a, Mizoram-in kan sum hmuh a pung dawn tih kan hre ta. ZPM hian Pathian kaihhruaina kan chang zel tih bak hi sawi tur a awm lo,’ a ti.

Ruata chuan, "Pathianah kan intulut a, kan minister rualten, 'Keini chu kan ei ru ve lo vang,' tiin mipui hmaah thu kan tiam a. Vawiin thleng hian eiruknaa kut fai lo hming pu hi sawi tur leh hmuh tur kan zinga kan awm lo hi Pathian kaihhruaina vang a ni tih loh rual a ni lo, Pathian hnenah pawh lawmthu i sawi zel ang u. Nikumah ZPM sawrkar-in thlai thar leina budget-ah a dah a, Handholding-ah kan dah a, kan ring nghal mai a. Mahse, House-ah, “Khaw nge thlai thar leina tur in dah chu?” tiin min zawt a. Chumi a nih avang chuan kan CM-in, 'Lo dah tawh rawh u, a hranpain, handholding-a dah loin, an hre thiam lo em mai,' a ti a, Kum 2026-27 Budget-ah hian thlai thar leina tur kan dah dawn a ni,’ a ti.

Agri. Minister chuan, "Nikumah khan India ramah sawhthing rate a chhe em em a, Kg-ah Rs. 13, 14, 15 te a ni chho a. Tunah chuan sawrkar hun tiam a thlen hma pawh khan Kg-ah Rs. 30 ten an hralh a ni. Mizoram sawhthing quality that bikna hi India ram mai ni lo, khawvelin a hre tan mek a ni. Marketing Board-in buyer kan zawn mek Mizorama rawn kal tam ber hi South India-a mi an ni. 'Engati nge, Karnataka te, Kerala-ah te sawhthing a tam ve tho si a,' ka ti a, 'Keini sawhthing chu pesticide a tam lutuk a, nangni sawhthing chu organic certificate nei lo mah ula kan lei ngam a, kan lei duh zawk a ni,' tiin min chhang. Kuminah chuan inchhuang ang u, kan ti a. Kan sawhthing quality thatna hi khawvelin a hre tan tawh a, lo induh ve deuh kan duh a ni," a ti. 

PC Vanlalruata chuan, "Support Price Mode-in kan kal dawn a, kan sawthing chingtute pawhin Marketing Board-in ruahmanna kan siam hi lo zawm se, kan sawrkar ruahmanna hi lo ngaihchang thiam se, Kg-ah Rs. 50-in an inpte-ah a lut dawn e. Mizoram sawhthing quality tha hi khawvelah kan zuar chhuak dawn a, min lo nghak hram hram rawh u. Nikumah Congress leh MNF pawhin an cho ruih ruih a, buyer an kal mai loh avangin min beituah an tang a, dem tur an zawng a ni. A sawhthing neitu MNF leh Congress pa kan en lo, sawhthing chauh kan en a, Kg-ah Rs. 50-in kan tihsak mai. Kan ti zel dawn," a ti.

Agriculture minister hian nikum lamah Hmunphiah-ah harsatna an tawk tih a sawi a, a kum khatnaah kha chuan farmer-te thiam loh ve bawk nen, anni lam experience la nei lo bawk nen, an ti fuh lo tih a sawi a. Kuminah chuan a season tirah a lei hun tur an siam a, tunah hian an inkau vek tawh a. Collection Centre-ah Kg-a Rs. 80-a lei turin an inpeih tawh thu a sawi.

Hmarcha pawh chhim lamah an lo dawn tlawm a, chhim lama an hotute an hrilh a, farmer-ho hnenah an bituk aia tlawm chuan lo hralh lo tur leh support price nen an che dawn tih lo hrilh turin an tih thu a sawi a. Vaiho an rawn inlan leh mek tiin, Hmar lamah chuan hmarchaah an buai lo. Sawrkar rate bituk aia toin an hralh mek tih a sawi.

PC Vanlalruata chuan, "Pathian zarah malsawmna kan dawng a, sawrkar pawhin sum leh paiah harsatna kan nei lo. Ba kan rul hnem a, a thente chu Congress sawrkar laia ba te a ni. ZPM sawrkar hnuah sawrkar hna thawkten a hun takah hlawh an la, an lawm em em. Hengte hi chung lam malsawmna kan dawn vang a ni. ZPM hi Pathianin min kaihruai a ni tih hi pawm ila, Pathian chakna ringa kan kalna dah bo mai loin, keimahni theihnaa hengte hi thlengah i ngai lo ang u. Pathian kan rin tlat chuan malsawmna hi vawiina kan dawn let tam tak hi min pe ang. ZPM kan vanneihna em em chu Biak In hrang hrangah zing tawngtai inkhawmah te tawngtaipuitu kan ngah a, kohhran mite chungah pawh lawm thu kan sawi a ni," a ti bawk.