ZALEN, Apr. 15, 2026: 2025-26 season chhunga Mizoram tan leh club tana run 1,032 vaw chhuaktu, Joseph Lalthankhuma chu Cricket Asociation of Mizoram (CAM) Men’s Cricketer of the Year atan thlan a ni a. Hmeichhiaah BCCI Women’s Under-19 T20 Trophy (Plate)-a Mizoram champion-puitu, Jacinta Laltanpuii thlan a ni bawk.

Board of Control for Cricket in India (BCCI) hnuaia association/state-te inelna ngaihhlut ber, Ranji Trophy-a Mizoram team captain, Joseph-a hian season liam ta khan Mizoram aiawha a feh chhuahnaah run 695 siamin wicket thum a la a. A kaihhruai Mizoram mipa team chu Syed Mushtaq Ali Trophy (Plate)-ah champion-puiin season tharah a thiam rual inelna, Elite a kaipui.

Tual chhunga inelnaah Ramhlun Venglai, Aizawl tlangval hian run 337 siamin wicket 10 a la bawk a. Tun hnai lawk khan CAM leh Central YMA Sports Sub-Committee buatsaih Inter-Branch YMA Cricket Tournament-ah an branch YMA a champion-pui leh bawk.

Joseph-a hi kumin (April-September) hian United Kingdom-a Northamtonshire Cricket League-a Premier Division (league sang ber)-ah Old Northamtonians Cricket Club tan khel turin a inbuatsaih mek bawk.

Season thum CAM Awards sem tawhah Joseph-a hian mipa che tha ber chawimawina hi vawi hnih a la tawh a. A hmasa ber, 2023-24 khan a lo dawng tawh bawk a ni.

Women’s Cricketer of the Year Jacinta-i hian season liam ta chhungin Mizoram tan run 482 vaw chhuakin wicket sarih a la bawk a. New Chalrang nula hian Women’s Under-19 T20 Trophy (Plate)-ah hian a captain-na hnuaia Mizoram an champion a. Women’s Under-23 One Day Trophy (Plate)-ah nomawi la bawkin inelna pahnihah hian Elite a kaipui ve ve a. Under-19 One Day Trophy (Plate)-ah final a luhpui bawk.

Under-23 One Day Trophy-ah hian all rounder Jacinta-i hi vawi ruk khelhah run 290 siamin century leh half century vawi khat ve ve a vaw chhuak a, nomawi an lak theih nana thawh hlawk ber pakhat a ni a. Under-19 One Day Trophy-ah hian a zawna half century vawi thum siamin vawi ruk khelhah run 232 zet a thawk chhuak bawk.

Thawhlehni zana Youth Recreation Centre, Falkland, Aizawla season liam taa player che tha bik thlan chhuah leh chawimawina hlanna hun, 3rd CAM Awards-ah hian Jacinta-i ruala Under-19 T20 Trophy (Plate) leh Under-23 One Day Trophy (Plate)-a champion, opening batter Vanlalruatpuii chu Women’s Junior Cricketer of the Year atan thlan a ni.

Tlangnuam Vengthar, Aizawl tleirawl, Ruatpuii hi nomawi an lakna inelnaah hian player tha ber, Player of the Tournament-ah thlan a ni ve ve a. Under-19 T20 Trophy-ah run siam tam ber niin vawi ruk a khelhah run 190 siamin vawi hnih half century a siam nghe nghe.

3rd CAM Awards-ah hian huang sarihah chawimawina sem a ni a, huang tinah hian nominate pathum zel an awm a ni.

3rd CAM AWARDS DAWNGTUTE:

Men’s Cricketer of the Year - Joseph Lalthankhuma, Ramhlun Venglai

Women’s Cricketer of the Year - Jacinta Laltanpuii, New Chalrang

Men’s Junior Cricketer of the Year - Malsawmzela, Tlangnuam

Women’s Junior Cricketer of the Year - Vanlalruatpuii, Tlangnuam Vengthar

Boy’s Emerging Player of the Year - Henry Lallawmzuala, Zemabawk

Girl’s Emerging Player of the Year - Vanlalremruati Pachuau, Electric Veng

Umpire of the Year - Lalrambuatsaiha, Bawngkawn West