ZALEN July 10, 2027 : Aam Aadmi Party Mizoram chuan vawiin khan Aizawl Press Club-ah thuthar thehdarhtute an kawm a, damlo zu mamawh Red Card siam nana sum chawi tir kher tul an tih loh thu an sawi a, Chief Minister chu a sawi anga awm tura an duh thu leh MUHCS-a inziahluh hun awm tha an tih loh thu te an sawi bawk.

AAP chuan tun hnaia damlo zu mamawh tana Red Card siam tura kum tin Rs 5000 chawi a ngai kher chu tha an ti lo a, Rs 5000 lai sen kher ngai lo hian damlo te hi sawrkar hian free ngei se an tih pui thu an sawi.

ZPM leader, tuna Chief Minister-in ZPM Chief Minister chuan portfolio a nei ve dawn lo a, a minister-te a enkawl ang a, chak lo deuh a dawmkang ang a, a tanpui mai tur thu a sawi leh a thusawi thenkhatah chuan Chief Minister chuan Works Department a chang dawn lo tih a sawi te hi hriatfiah harsa an tih thu leh tunah Portfolio 7-a chang leh ta hi mipui min bumna a ni a, a thusawi ang in awm se an ti.

MUHCS kalpui mek hi tha an ti a, kalpui zel nise an ti rualin, inziah luh hunbi a awm hi awm tawh lo se, hei hian damlo mangangte nasa takin a chhawk zangkhai dawn a ni. ZPM Party Manifesto Bu, SDRP Chapter 8, sub point f-a an intiam angin inziah luh hun hi engtik lai pawhin hawn ni se, an ti bawk

Mizoram Sawrkar hmasate'n an la lak ngai loh kawng siamthatna/enkawlna (Road Cess) leh khawtlang hmasawnna ruhrel siamna (Social infrastructure cess) tur chhiah, petrol leh diesel-ah litre 1 a cheng 4, September 2024 atanga an chawi hmang hian Mizoram pum kawng siamtha se, khawtlang hmasawnna ruhrel hi a takin mipui hnen thleng se. Sum lut leh chhuahna hi mipuiin an hre meuh lo a, langtlang takin puanzar tur in sawrkar an phut bawk a ni.

2026 Special Intensive Revision-ah Chakma tamna khua 23 laia voters 100 percent pung hi dan dik taka pung nge dan dik lo a pung tih hi sawrkar in enfiah nghal se an ti bawk a ni.