ZALEN July 23, 2026: Mizoram Govt. Adhoc-Aided High School Teachers’ Association (MIGAHTA) ten ni thum chhung lungawi lohna an lantir hnuah vawiinah khan school dinhmun hniam zawka dahna Rules thar an hal.

MIGAHTA chuan Provincialised phuta sawrkar kan nawr mek laiin, school dinhmun hniam zawka dahna The Mizoram Education (Lumpsum Grants-in-Aid for General Maintenance of Private School) Rules, 2026 chu sawrkarin Thawhlehniah khan min tihchhuah hnan avangin vawiinah hian he Rules thar hi Mizoram hmun hrang hranga Adhoc High School 80 chuangah kan hal an ti.

Adhoc High School 80 chuangte chuan Thawhtanni atangin lungawi lohna lantirin July 20 leh 21 ah khan badge dum an bel a. Vawiinah khan No Teaching Day an hmang bawk.

MIGAHTA chuan No Teaching Day hi naktukah pawh an hman chhunzawm leh tur thu sawiin, sawrkarin an duh ang chhanna an la pek loh chuan July 27 leh 28 ah Mass Casual Leave an la ang a, July 29 atanga 31 thlengin Aizawlah Peaceful Sit-in Demonstration an nei leh dawn tih an sawi.

Association chuan, “He ti chung pawha sawrkar kan ko ei zo lo a nih chuan nasa zawka sawrkar nawr dan tur pawh kan ruahman fel vek tawh a ni,” an ti.

MIGAHTA chuan an hmalakna avanga zirna a khaihlak theih avangin zirlaite, nu leh pate leh mipuite hriatthiamna an ngen a ni.