ZALEN November 11, 2025: MNF chuan vawiin khan Mizo Hnam Run-ah Chhung Inkhawm neih a, he huna thusawitu MNF Treasurer Lalruatkima chuan Assam Rifles ram chhuahsan hnua a enkawl dan reltu Adisory Committee-ah an tel zui ve chu remchang lovah an ngai a, he committee kaltlang hian kohhran ram chhuhsak tumna awmin an hmuh thu a sawi.

Lalruatkima chuan, "Kan Chief Minister-in ‘MLA 27 mipuiin min thlang a, rorel pui kan ngailo’ tia ni 22.9. 2025-a a sawi hnuah khan AR luah ram chhuahsan hnu enkawl dan reltu Advisory Committee ah hian tel zui remchang tawh loah kan ngai. Pathian ram din tuma insawi chunga Kohhran ram chhuhsak talh tumtute hian he Committee hminga rulkua zen an tumna kal mek hi MNF chuan kan hmuhhmaih lo a ni," a ti. 

Ruatkima chuan, "Kohhran rilru tina zawnga ke pen hi MNF chuan a tih ngai loh niin, FCAA an Adopt avangin ZPM sawrkar chu CYMA tan Yellow Card pek a ngai ta hial mai te hi a lungchhiatthlak a, rintlak loh sawrkar an nihzia a ti lang chiang hle a ni. Kuthnathawktute sawhthing man cheng vaibelchhe tam tak bo mek chhuichhuak tur pawhin MNF chuan theihtawp a chhuah zel dawn a ni," a ti bawk.