ZALEN December 16, 2025: Social Welfare & Women and Child Development Minister Lalrinpuii chuan Anganwadi Worker zawng zawng te smart phone an pe vek tawh a, hei hian hnathawhna kawngah thui takin a pui a, a hlawhtlinna hi department dang tan pawh zir tham a ni a ti.

Vawiina chanchinthat thehdarhtute a kawm naah Lalrinpuii chuan, "2011 Census ang chuan Mizoram chhungah khua 829 kan nei a, hetih lai hian Mizoram pumpuiah chuan Anganwadi hi 2244 kan nei mek a ni. Anganwadi Workers pawh 2244 kan nei tihna a nih chu. Heng kan workers zawng zawng hi tun kum khan smart phone thar kan pe vek a. He phone hmang hian Anganwadi workers te chuan Nutrition pek dan zawng zawngte hi report an pe tawh a, beneficiaries te pawh facial recognition hmang vekin an identify tawh a ni."

"Kan worker te hi Lehkha thiam pui pui leh kum naupang zawk anni vek lo tih chu min hriatpui tlang vek ang a, mahse tha takin apps te hi kan hmang thei mai hi WCD lama kan hotute that vang a ni a tih loh theih loh a. Department dang tan pawh hian an achievement hi chu zir tham niin ka hria," a ti.

SW&WCD Minister chuan, "Nikum 2024-25 chhung khan Anganwadi 1600 lai chu cheng nuaih 1 zel senga tihchangtlun a ni a, DAJGUA Scheme hnuai atangin Anganwadi thar 41 dintharna turin approval hmuh a ni leh tawh bawk a. Ministry of Tribal Affairs - Article 275 hnuai atangin Anganwadi Building 17 sak that a ni bawk a, Department sum atangin Anganwadi – 80, ICDS Godown -3 leh CDPO Office – 1 sak that a ni," a ti bawk. 

Lalrinpuii chuan Grassroot level Field worker- Anganwadi Worker leh Helper hlawh leh Health Department lama field a thawktu tak tak - Asha Worker te hlawh pawh cheng 500 theuhin tihpun a nih thu a sawi bawk.