ZALEN March 20,2026 : Mizo Aw pawl te hmalakna in “AI hmanga Mizo tawng humhalh” tih thupui zirhona leh hemi atana hna thawk tur zawnna chu vawiin khan Mizoram University Guest House Conference Room-ah buatsaih a ni. 

He workshop hi Artificial Intelligence (AI) hmanga Mizo tawng vawn him leh humhalh dân zirna atan leh a tangkai dân sawihona atan a buatsaih a ni. Programme hi Prof. Lalngurliana, Department of History & Ethnography, Mizoram University kaihruaina hnuaiah hman a ni a, ani hian he zir hona chungchang te sawi a sawi hawng a. 

Chief Guest Prof. Lalnundanga, Registrar, Mizoram University chuan tunlai khawvel thang zel ah Linguistic department pawimawh zia te sawiin, MZU in hma a lak zel tur thu a sawi a. Tawng humhalh pawimawh zia sawiin, "Kan regional language te hi central lam pawhin an rawn ngai hlu a, chawikan a pawimawh zia hria in hma an rawn la a, hemi avang hian authenticate thei tur authority an awm a tul hle," a ti a. Khuallian chuan he workshop hian Mizo tawng humhalh kawngah ngaihtuahna zau zawk leh thuk zawk a tuh a beisei thu a sawi. 

Resource Person Dr. Lalnunthangi Chhangte, chuan Linguistics subject leh Technology inkungkaihna chungchang sawiin, enchhinna nen zirtirna hun a hmang. Dr. Thangi hi Linguistics subject ah PhD, University of Oregon, USA atangin a zir chhuak a. Northeast-a Tibeto Burman huang chhunga tawng hrang hrang- Mizo tawngah leh a dang te ah hian specialist a ni a. Tin heng Grammar, lexicography(dictionaries), translation ah te, orthography and software hmandan kawng hrang2 ah te linguistic Specialist a ni bawk. Dr. Thangi hian Living Word Communicators, Shillong-ah Executive Director dinhmun a chelh mek.

He workshop ah hian mithiam rual ten AI tools technical demonstration hun hmangin, AI siam dawn pawh a Mizo tawng dik tak hman a tul zia te sawi ho a ni bawk. Joseph C. Lalmuanawma leh David Lalhruaitluanga ten zirtirna pein, workshop chhim tute tan a taka zirtirna leh tihchhinna (hands-on guidance) an pe bawk.