ZALEN March 3, 2026: Department of Personnel & Administrative Reforms (DP&AR) changtu minister K Sapdanga'n sawrkar hnathawk aikal la, an hna atanga chawlhtir mi 29 an awm tawh tih house a hrilh.

Vawiin assembly budget session zawhna hunah member te zawhna leh zawh belhna te chhanga he thu hi sawiin, DP&AR minister chuan, sawrkarin aikal lak a tawp theih nan nasa takin hma a lak thu leh aikal la te chu a tul anga hrem zel an nih thu te, tha taka zawm a nih thu te a sawi.

DP&AR minister in a tarlan danin, tourism department atangin aikal la chawlhtir mi 18 an awm a, Higher & Technical Education atangin hremna tenau pek mi 8 an awm, Power & Electricity department atangin chawlhtir mi 7, School Education department atangin chawlhtir mi 2, General Administration Department atangin chawlhtir mi 1 leh Health & Family Welfare department atangin chawlhtir 1 an awm. Aikal lak avanga an hna atanga chawlhtir zawng zawng zat chu 29 niin, hremna tenau pek zat mi 8, an vaiin 37 an ni.

Samagra Shiksha hnuaiah aikal la mi 9 tunhnaiah hmuh chhuah belh an nih thu sawiin DP&AR minister chuan, chung mite chu insawifiahna hun pek an nih hnuah action lak a nih tur thu a sawi. "Sawrkar ngaihdanah chuan loh theih loh a aikal lak ngai a awm theih loh. Chutianga thawk thei lo an awm a nih palh pawhin Mizoram Special Voluntary Retirement Scheme 2024 siam a ni a, tun thlengin aikal lak dan siam a tum lo," a ti bawk.

#ZalenNews