ZALEN March 10, 2026: Parliament Budget Session neih mekah Rajya Sabha MP K.Vanlalvena chuan Aizawl khawpui Traffic Jam tih reh nan Flyover bridge siamsak turin sawrkar laipui a ngen.

Rajya Sabha MP chuan Aizawl khawpui chu tlangrama awm a nih avangin kawngpui neihsa te chu a zau tha tawk lo tih sawiin hei hian traffic jam a siam nasat thu leh sawrkar office kal te, zirlai leh zirtirtu ten a hun takah office leh school an thlen hman loh thin thu te a sawi chhuak a. Hei hian mipui nunphung a tikhaihlak a ni mai lo va, hmasawnna a tibahlah a ni tih thu K. Vanlalvena chuan a sawi.

Sawrkar laipui hnuaia Housing and Urban Ministry chuan India ram khawpui tamtakah Flyover bridges an siam tawh a. State hausa zawk khawpuiah te Union Urban Ministry-in flyover bridge an siamsak theih chuan State rethei zawk Mizoram khawpui Aizawl-ah pawh flyover bridge a siamsak ngei chu a beisei thu a sawi bawk.