ZALEN September 7, 2026: UDPA Department bultuma Joint Coordination Committee hnuaia Central YMA, Aizawl Municipal Corporation leh Aizawl Smart City Ltd thawhhona hnuaiah YMA, Aizawl City Branch-te veng fai inelna neih mek a ni a, vawiin September 7, 2026 Thawhṭanni hian endik hna thawh ṭan a ni.

Aizawl City Branch Fai Inelna 2026-ah hian endiktu (panel of judges)-te chu - Save The Riparian hruaitu Pu Romalsawma Hmar, MJA General Secretary Pu K. Zothanpara leh environmentalist Dr Gospel Lallawmzuali te an ni a; vawiin zing atang khan veng fai dan an endik ṭan a ni.

Faina lama YMA branch-te intihsiakna atan hian May 28, 2026 khan tehfung inhrilhfiahna leh kalpui dan tur CYMA Hall-ah inhrilhfiah a ni a, Aizawl city branch YMA tin aiawh an tel. Judge-te hian YMA branch tinte vawi hnih \heuh an endik dawn.

Endik thawh khatna chu September - December, 2026 chhunga neih tur a ni a. Thawh khatnaah hian YMA branch tinte chu thlawh chhuah vek a ni dawn a, veng chhung hmun hrang hrang an en dawn bakah, YMA branch hruaitu kawmin, faina atana branch hmalakna an zawtfiah dawn a ni.

Endik thawh hnihna erawh chu 'surprise visit' a ni dawn a, January - March, 2027 chhunga neih tur a ni. YMA branch tinte chu judge-te'n an endik hun tur hrilh tawh lovin, a rukin an endik dawn a, YMA hruaitute nen pawh an inkawm tawh dawn lo.

Aizawl City Branch Fai Inelna 2026-a lawmman tur chu - pakhatna Rs 3,00,000, pahnihna Rs 2,00,000 leh pathumna Rs 1,00,000 a ni a; a ti tha zual, Top 10-a langte hnenah Rs 50,000 theuh pek a bawk ang.

He faina intihsiakna hian a tum ber chu, Mizoramin faina lamah hma kan sawn zel theih nan leh mi tinte'n kan nunah fainain hmun a luah a, theihtawpa kan chenna leh kan chhehvel vawn faina kawnga hma kan sawn theihna tur a ni. Faina hi mi tin mawh a nih avangin, YMA branch tinte chu an veng chhunga pawl hrang hrang leh kohhrante thawhpui a, inzirtirnate nena hma la a, faina intihsiaknaa tawp mai lo a, hma hun kal zel turah faina nunpuitu ni tura inbuatsaihtir a tum a ni.