ZALEN March 30, 2026: Vawiin khan Mizo Hnam Run chhung inkhawm neih a ni a. MNF President Zoramthanga, Ex. CM chuan AMC election 2026 Manifesto a tlangzarh. MNF Sr. Vice President Dr. R. Lalthangliana, MLA chuan thusawiin, "Aizawl-ah hian mifing leh fel tak tak, thil awmze manthiam leh hria an tam, ZPM sawrkar hian min bawl mai mai tum tawh suh se. State capital Aizawl atanga Thenzawla sawn tumna chu, document hmuh tur nen a awmreng laiin Peace City, tiin an sawi leh daih si," a ti.

"AMC inthlan hi an zuam vaklo a ni ang, term zawh hnuah pawh corporator-te kut phuarsak siin inthlan hun an pawtsei a. Mipuiin oil kan leina chhiah chawi tlingkhawm hmangin kawng an cheitha a, hei hi tutetan pawha thil harsa lo, lemchanna chikhat mai a ni. Tun tum AMC election lo awm turah hian MNF ten candidate kan duhtui a, Aizawl khawpui hmasawnna atan hna tamtak, rotling kan lo thawh tawh avangin beiseina sangtak kan nei a ni," a ti. 

Dr. Thangtea chuan, "Assam Rifles khawpui chhung atanga sawnchhuah chungchang hi MNF sawrkar pian hmasakber, Pu Laldenga CM na hnuaia buaipui tan daih tawh kha a ni a. Khatih hunlaia Revenue Minister Pu Tawnluia hmalaknain Zokhawsanga an insawnna tur ram buaipui a ni tawh a. MNF General Assembly vawi 25 na, Oct ni 21-22, 1987-ah, AR chhuahsan tur ram chu public purpose atan chauhva hman tur a ni, tiin kan lo rel daih tawh bawk a ni. AR sawnchhuak tur hian MNF-in tha a thlah ngai lova, ZPM sawrkar leh an insawnchhuah hun a innangfuh ta a ni," a ti. 

Health Minister lo ni tawh Dr. Thangtea chuan, "MNF sawrkar laia CM Pu Zoramthanga'n a ngaih pawimawh em em healthcare scheme kan duanfel vek tawh, a taka kan hman hmanloh chu, chhunhan pakhat pawh danglam mang lovin ZPM ten MUCHS tiin an hmang a, kan hmalakna an chhunzawm thei leh kan ruahmansa leh kan sum hman bang an rochun thei hi a lawmawm hle a ni. MNF hian ram rotling tak tak sawisenloh kan buaipui a, kan din tawh a, ZPM sawrkar hi kan kuhmumah an par, a tih loh theihloh a ni," a ti. 

MNF Sr. Vice President chuan, "ZPM sawrkar hnu reiloteah MNF in inthlan awm zawng zawng deuhthawah hnehna kan chang zel a. ZPM ten hnehna an chan ve chhun pawh kan hlahthlemna awm tak chauhvah a ni. Lengpui scam pawh MNF ten CBI chhuitir kan huamin kan duh em em a, House-a ka bill putluh pawh ZPM ten min passed pui a ni. FCAA chungchangah pawh MNF kan ngawibo dawn lova, kan enliam theilo. MNF hi party danglam bik kan ni a, party dang nena tehkhin theih kan nilo. Martarte thisena din leh hnam thuthlunga lung phum kan ni. Thudiklo leh thildiklo kan tih a rem ve lova. Min hruaitu Pathian duhdan anga, lungrualtak leh taima taka, malsawmna dawng tlaka ke kan pen zel a tul a ni," a ti.