ZALEN June 17, 2026: Aizawl West-II bialtu MLA Lalnghinglova Hmar, Minister of State chuan vawiin khan Dinthar YMA Hall-ah Gov't Dinthar P/S leh Gov't Gairigon P/S, Dinthar naupang 213 hnênah school uniform pheikhawk a sem. Aizawl West - II huamchhung sawrkar P/S zirlai naupang 673 te hnênah school uniform pheikhawk hi pêk vek an nih tur thu a sawi.

Bialtu MLA Lalnghinglova Hmar chuan zirlai naupang leh nu leh pate hmaah thu sawiin, Aizawl-ah sawrkar school a tha tâwk a ni tih a sawi a. "Zirna hmundang kan sawisel lo a, sawrkar school erawh Mizoramah zirtirtu tha ber awmna an ni. Sawrkar sikula thawkte chu 'train' chhuak an ni. A sâng lam High School leh HSS-ah luh kan inchuh luai luai a, Dinthar Veng ngei pawh hi sawrkar P/S te zirna a tha êm êma school building-in a lût duh zat a zo lo a ni," a ti a, remchâng dapa 'building' neih dan ngaihtuah a nih tur thu a sawi.

"Aizawlah sawrkar school a tha tâwk tih hi Aizawl West atangin, Dinthar Veng atangin tan kan tum a ni. In fel êm avangin pheikhawk hi in dawng vek ang. Vawiin hi a bultanna a ni a, Aizawl West-II Primary School section-a lût tawh phawt chuan in dawng vek ang, a dangah pawh kaisàn zêl kan tum a ni," tiin Lalnghinglova Hmar chuan a sawi bawk.

Aizawl West-II huam chhunga veng te - Dinthar, Tuikual South leh North, Dawrpui Vengthar, Vaivakawn leh Kanan venga Sawrkar school P/S section zirlaite hnênah a tah tawlin school uniform pheikhawk hi pêk vek an ni dawn a. Sorkar school thatzia pholan an tum a ni.