ZALEN July 5, 2026: Aizawl khawpui chhunga damdawi in pahnih, Ebenezer Medical Centre leh Trinity Hospital te chuan Myanmar atanga damlo pantute chu medical tourist anga an ngaih mai thu an sawi a. Chutih rualin rambuai avanga harsatna tawk damlo buaipuitu Médecins Sans Frontières (MSF)/Doctors Without Borders nen erawh heng damlote chungchangah hian inremna an neih thu an sawi.

ZALEN-in Ebenezer Medical Centre leh Trinity Hospital thawktute a biaknaah Myanmar mi leh sa damlo an enkawlte hi an ramah damdawi in pan tur an neih loh vanga Mizoram rawn pan an nih thu an sawi a, Chin State leh Arakan lamah damdawi inte tihchhiat a nih avangin an rawn pan ni maia an hriat thu an sawi a, thenkhat hi chu Champhai atanga refer te an ni tih an sawi bawk.

Damdawi in pahnihte hian Myanmar atanga an hnen pante hi medical tourist-ah an ngai a, ram dang mi lo enkawl chu Mizoram tan a pawina awma an hriat loh thu sawiin, “Damlo an nih miau chuan kan lo enkawl an ngai a. Tuna kan enkawlte hian sum tam tak kan state-ah an rawn luhpui a, hei hi kan tan a that bakah medical tourism neih hi kan tum tur niah kan ngai a ni,” tiin doctor pakhat chuan a sawi. Damlo an enkawlte hi raltlan an ni vek lo a, a hranpa-a pan hi an tam zawk niin an hriat thu a sawi bawk.

Damlo inenkawlna senso tumsaktu awm anga sawi awmah anni lam chuan chiang taka hriat an neih loh thu an sawi a, "Damlo kan enkawl ten an pek a awm a, hmun dang atanga rawn pek a awm bawk a. Chubakah chuan Médecins Sans Frontières (MSF) / Doctors Without Borders kaltlanga pek sak pawh an awm bawk a ni," an ti. Hmun dang atanga rawn petute hi tute nge an nih tih lam an ngaihtuah lem lo tih ZALEN an hrilh.

Ebenezer Medical Centre leh Trinity Hospital-ah hian Myanmar lam damlo hi an thahnem a, Hospital chhungah leh a bul vel dawr thenkhatah pawh Myanmar tawnga thu ziah hmuh tur a tam a, hei hi mi sawi hlawh te pawh a ni a, damlo enkawl zingah ramdang mi hi an thahnem thawkhat tih damlo awmpuitute atangin thu dawn a ni bawk.