ZALEN March 20, 2026: ZPM General Headquarters chuan party office-ah vawiin khan Political Session an nei a, he huna thu sawitu AMC Ward VIII Corporator Christina Roluahpuii Sailo chuan Mizo thalaite politics a zuanglut turin a sawm a, AMC kalpui a nih dan tha tawka lova a hriat thu leh AMC-ah an tling ngei a ngaih thu a sawi.

Christina Roluahpuii Sailo chuan, “Mizo thalaite hian politics hi muangchanga ngaihtuah a, kum upat hnua tel ve chauhna tura kan ngai hi hnampui zawkte kan tluk theih lohna a ni. Kan chak that lai, kan vanglaia ram leh hnam tana pen chhuah hi a tha zawk lo em ni tih hi ka incho vena a ni a. Keini thalaite hi kan ram tan a tha lam zawnga politics kuai hertu kan ni thei a, chumi tur chuan huaisen taka ke kan pen luih ve tang tang a ngai. Rual u zawkte thlazar hnuaiah kan ram tan eng emaw tal ka tih ve theih beiseiin politics-ah hian ka zuang lut a, ka inchhir lo a, kan ram tana nasa leh zuala ke kan pen theihna politics-ah hian rawn zuang lut turin ka thalaipuite ka sawm a ni,” a ti.

Corporator a nih anga hna a thawh dan sawiin Christina-i chuan, “Lang tlang takin Ward Fund zawng zawng Ward Committee kal tlangin kan rel a, Property Tax Return chauh ni lo, Ward Fund zawng zawng hi kan rel a. Mipui tam zawkin an chhawr theih tur kan zawngin kan thawk thin. Kan hna thawh dawnah YMA chanchinbuah estimate nen hna thawh tur hrilh hriat thin a ni a. Sorkar kum a zawh zelah ward fund hmanna hi ward chhung chhungkaw tinah kan sem thin bawk,” a ti.

AMC inthlan lo awm turah Aizawl mipuite ZPM candidate-te vote tura ngenin, “Sawrkarna kan chang a nih phawt chuan Aizawl mipui tan ro kan rel dawn. AMC hi contract thawh tur semtu ringawtah min ngai mai ang tih hi hlauhawm tawh. Roreltu kan nih ve ngam tak tak a ngai. Mipui tan phurrit siamtu ni lo a, mipuiten AMC awm hi a ninawm ti loin, AMC pawimawhzia, tangkaizia leh hlutzia an sawi hun hi a nghahhlelhawm tawh. AMC Playground, Bawngkawn suasam a nih dan te hian rilru a tina khawp mai. Hetiang thil hi ZPM kaihhruai AMC sawrkar a piang a nih chuan kan remti ve tur a ni lo."

"Aizawlah tute nge sawrkar mek? Engtiangin nge ro an rel? An rel tha kan ti em? Kan lung a awi tawk em? A la awi a nih chuan vote leh ila; mahse, kalphung thar zawkin Municipal hi kaihhruai ni ve tawh se kan ti a nih chuan kan bial theuhah ZPM candidate-te vote tlin ngei i tum hram hram ang u. State a sawrkar party tho AMC-a a sawrkar hian thil tih a awlsam bik hle a ni. Aizawl khawpui bial zawng zawngah ZPM MLA vek an ni a, AMC-ah pawh kan sawrkar ngei a tul hle a ni."

"State sawrkar tha chakna hmang tel thei corporator-te tan mahni ward enkawlna leh hmasawnna hna thawhna kawngah thil tih a nuam a, hma lak chak a awlsam bik. Kan sawrkar leh kan MLA-te hian thawhpui duh loh an nei hauh lo ang. Mahse, duh inang lo, tum inang lo, kalphung inang lo corporator, inthlan leha anmahni tlakna atana bei turte nena thawh dun ai chuan, tum inang, kalphung inang, duh inang corporator nena thawh dun chu an chakın an phur zawk ngetin a rinawm. Phur taka thawh dunna chuan rah tha a chhuah dawn a ni,” a ti bawk.