ZALEN, Mar. 26, 2027: MNF Treasurer Lalruatkima chuan, “Kan state budget aia tam leiba nei dinhmuna min dah mektu leh chhiah tam tak tipunga ram mipui min dahkham mektu state-a sorkar lai mekte hi AMC enkawl turin an rin ngam ka ring lo,” a ti.

Ningani chawhnua Aizawl Municipal Corporation (AMC) Ward I, Durtlanga Durtlang MNF AMC Campaign Committee buatsaiha AMC inthlan lo awm tura campaign kick-off chu MNF treasurer hian hmanpuiin thu a sawi.

Rka chuan state sorkarah leh AMC-ah MNF kaihhruai sorkar awm tawhten Mizoram leh Aizawl hmasawnna an thlen tawh dante sawiin, “Pathian, ram leh hnam dah pawimawh hmasa zel chunga ram enkawl thin MNF kutah AMC enkawlna pawh dah zui zel a him ber dawn a ni,” a ti.

AMC Election 2026 lo awm turah Pathianin candidate tha tak tak, thiamnaah te, kohhran leh khawtlang rawngbawlna thleng pawha mi chhuanawm tak tak a pe tih sawiin sorkarna an siam ngei kan tih a sawi a. Inthlan turah sum leh pai leh thil dangah innghat lovin an party innghahna neih sa, Sam 20:7 hre thar chungin Pathian hming lam hmasa zel tur an nih thu a sawi.

Campaign hawnnaah hian AMC Ward I MNF candidate C.L Biakhlua pawhin thu a sawi a, Aizawl leh Ward I hmasawnna tura a thiamna leh theihna a hman ngei theih nan vote turin ward mipuite a sawm.

AMC hi April 21-ah inthlan tur a ni a, April 27-ah vote tlate chhiar a ni ang.