ZALEN July 23, 2026: Aizawl Municipal Corporation (AMC) Executive Council chu vawiinah khan thukhawmin Rangvamual-a petrol pump dah belh leh AMC hna awlsam zawkna tura software siam thar chungchangte an sawiho.

Thutkhawm hi Mayor H. Lalremtluanga chuan kaihruaiin Ch. Saprawnga Truck Terminal, Rangvamual-a AMC asset-a petrol pump din tur ruahman chungchangah petrol pump din ngei tha tih an rel a. Company pahnih atanga dilna dawn a nih avangin meeting la neihpui hmasak mai ni se tiin an rel.

Thukhawmah hian AMC software siam chungchang pawh sawiho a ni a. Aizawl mipuiten AMC an dawr awlsam zawkna atan software hi a rang thei ang bera siam a nih theih nan hma lak nghal ni se an ti.

Software siam tur tana E-Office, Aizawl Dawrkai (Shop License dilna), Site Development & Slope Modification (Lei laih permit dilna), online hmanga complaint thehluhna tur, Hoarding & Advertising dilna an thlang a ni.

AMC chuan heng software thar te hmang hian mipuite'n license leh permit hrang hrang dilna, complaint thehluhna leh office hna kalphungte chu online hmanga awlsam zawkin an ti thei dawn a ni.