ZALEN May 4, 2025 : AMC inthlan result puan hnua party chhung inkhawm hmasa berah ZPM Gen. Headquarters Vice President thar Lalmuanpuia Punte, Adviser to CM chuan thu a sawi a, AMC inthlana hnehna an chan chu lawmawm a ti a, an party bik chakna ni lovin neutral ten an thlawp hle tih a hriat thu a sawi. 

AMC inthlan zawh tak chungchang sawi belhin, “2010 AMC hmasa berah Congress sawrkar khan tangrualin ward 10 chiah an la, AMC vawi hnihna leh vawi thumnaah pawh MNF-in ward 11 chiah lain an sawrkar hram. Tun tuma kan hnehna han thlir hian a sang fal a, a lawmawm hle. Chutih rualin keimahni party bil chakna ni lovin neutral-ten min la thlawp hle tih a hriat a. Chutiang taka min thlawp theihna tura chak taka hna thawktu kan Chief Minister leh Minister te, kawngpui tha min petu leh Healthcare scheme tha tak min siamsaktute hi an thawh hlawk hle a ni,” tiin, “Hnehna kan chan theihna atana pawimawh ber chu Pathian kan lamah a tan vang a ni a. Pathian malsawm tlakin, Pathian lamah keini party hi tang zel turin party mipuite pawh kan khawsak dan i fimkhur zel ang u,” a ti.

Tun hnaia HPC-D (Lalhmingthanga Sanate Faction) leh sawrkar inremna an siam dan chungchang sawi zauin, “Hun kal tawhah kum 1994-ah sawrkar leh HPC inremin Sinlung Hills Development Council din a ni a. Chuta lungawi ve loten HPC-D an ti zawm ta zel a. Chumi hnuah hun kal zelin kum 2018-ah sawrkar leh HPC-D (Pu Sangbera hote) nen an inrem leh a. Sinlung Hills Development Council kha development paihin Sinlung Hills Council an siam leh ta a. Chuta la tel ve lo tlemin April ni 30 khan silai an rawn tung leh ta a." 

"Heng HPC-D (LF) tlem la awmte hian ramri hrul khuaahte inthlan dawnin mipui an la ti thlabar fo thin a, sawrkar tan chuan chu thil chuan rilru a kap ru reng a, hetianga hnam bil hminga silai keng awm tawh miah lova sawrkar leh HPC-D(LF) nen inremna kan nei thei hi kan lawm em em a. State ralmuang bera kan inchhal fona tih dik famkimna, a hling kan phawi kimna chiah a ni hi thil chhinchhiah tlak tak a ni,” a ti.

Muanpuia chuan, “Mizote hi tu mah inti hrang tham kan awm lo va, kan khawsakna hmun azirin Hmar, Lusei leh Paite-ah te kan inchhal mai mai thin. Kan unau Mara leh Lai te pawh unau an ni, an hnam puan leh lam thlengin an inchuh. Pu L. Keivom thukhawchang takin, unau lovin ro an inchuh ngai lo, chu chuan unau kan nih tlanzia a ti lang chiang hle,” tiin, “Kan chhehvel Zohnahthlak unaute hi keiniho hian kan kuah khawm thiam poh leh kan lian tulh tulh mai dawn a ni,” a ti bawk.