ZALEN, Apr. 23, 2025: Blue Corn member zinga tuna rimawi khawvela la nung ber, KimKimi pawhin thu thar a rawn nei a. Tun tumah erawh mal zai lam a ni lo thung.

Blue Corn vanglaia ‘Angel Corn’ tia sawi thin, KimKimi hian an hmeichhe group lam dah thaa mal zai anga a kal zet hnuah, band angin project a nei a. Tunah hian an indin chho tan mek a ni.

An band hming chu — KimKimi and the Projects — tih a ni. Tun thla tir vel atangin bul tanin hma an la chho a. A vawi khatnan Dawrpui Vengthara restaurant lun leh lar tak ‘Donum Dei’-ah an zai tawh a. Mahse, hemi tuna an original line-up zinga member pakhatin eng emaw harsatna a neih avangin a tel chhunzawm thei dawn ta lo va. Tunah hian a aiawh tur an inla fel tawh bakah, member thar dang pakhat an la lut nghal bawk.

KimKimi and the Projects — a original line-up ang chuan acoustic band angin an kal hmasa phawt a. He line-up-a an drummer Moses-a’n rokhawlhna bik riau a neih avangin a tawpsan rih a. A aiawh tur hian Muan Muana tihfel a ni tawh a. Hei bakah, acoustic band anga an kal laia la awm lo, a ri thum lam tum turin Tea an la thar bawk.

Heti hian, acoustic band anga an kal ang ngawta kal tum tawh lo vin, tunah hian rimawi chhepchher chikim takin, full-fledge live band angin kal chhoh an tum a. Thil tihkhawmna lian tham zawkah rimawi chhepchher kim zawkin show pawh an nei thei tawh dawn a, neih pawh an tum.

KimKimi and the Projects — band hi cover band ang ni lo vin, tunah hian orignal band angin pangngai taka kal chhoh an tum a. Hla thar pawh neih tumin tunah hian hma an la mek a. An hla thar tur hi ‘Angel Corn’ hla lo phuah tawh zing atangin duh an thlang dawn a. Hei erawh an la thlang fel chiah lo niawm tak a ni.

An band thar chungchangah Kim Kimi chuan, “A tir chuan project vak hi kan nei lo. Hetia zai chhuah hi ka châk a, ka tawngtai nasa thei lutuk. Blue Corn angin kan hman thei tak tak tawh si lo va. Pathianin a hun takah musician tha tak tak min pe a, ka lawm tak tak a ni,” tiin ZALEN Thalai Khawvel a hrilh.

KimKimi and the Project hi vocal Kim Kimi, guitarist Bosco, keyboardist Rinhlua, drumner Muan Muana leh bassist Tea te an ni dawn a ni.