ZALEN Nov. 7, 2025 : MNF Legal Board chuan Mizoram Presbyterian kohhran in kum tam tak chhung a lo enkawl tawh, Assam Rifles biak in hmun chu ZPM sawrkarin dik lo taka chhuh luihsak tumin kawng hrang hrangin a bei mek tih an sawi.

Vawiin Aizawl Press Club a thuthar thehdarhtute an kawmna-ah MNF Legal Board Vice Chairman Lalpianfela Chawngthu chuan, Assam Rifles biak in hmun chu kum 38 kal ta, 1987 a an kuta hlan tura sawrkarin thutlukna a lo siam fel vek tawh a nih thu sawiin, kum 1948 a laih tan a nih thu leh November ni 24, 1950 ah Rev Thanga, Dawrpui bialtu pastor a hawng nia hriat a nih thu a sawi.

Kumin 2025, November ni 22 leh 23 a Platinum Jubilee lawm tura an inbuatsaihna kallai boruak ti nuam lo zawng leh, kohhrana lawi mekte ti mangang leh ti thlabar zawnga ZPM sawrkar hmalakna MNF in demawm a tih thu sawi bawkin, Mizoram Synod hnena lehkha dengkhawng tak a lo pek tawh pawh Jubilee an lawm hma ngeia hnukkir leh vek turin ZPM sawrkar an phut tih a sawi bawk.

#ZalenNews