ZALEN February 11, 2026: Assam Rifle ram chhuahsan hman dan tur ngaihtuah tura din pawl hrang hrang aiawh Advisory Committee te chu vawiin khan an Chairman, Chief Minister Lalduhoma hovin CM Conference Hall-ah an thukhawm a. Hei hi an thutkhawm tum ngana a ni.

A thurel langsarte chu:

1. November ni 18, 2025 a an thutkhawm vawi linaa an lo rel tawh, "AR ram chhuahsan hmunhma leh building hman dilna lam reng reng committee-ah chhawpchhuah tawh loh ni se" tih chu kenkawh zel tur a ni.

2. Canteen Kuala Hari Mandir sawn nan Loch House leh CHAN Office inkarah ram pek a ni dawn.

3. Loch House chu a lan dan ti danglam lova chei that an rel a. A lo hlut zual theih nan hman tangkai dan ngaihtuah tur a ni.

4. Vanapa Hall hi a upat tawh avangin Assam Rifle-te insawn hma khan sorkar chuan sak that a tum thu a lo puang tawh a. Nimahsela, Assam Rifle an insawn takah chuan Vanapa Hall lian zawk leh changkang zawk sakna tur hmunhma a lo awm ta a. Chuvangin, Advisory Committee hian Convention Centre sak an lo pawm fel tawh chu Vanapa Hall hming puttir an rel a. Tuna Vanapa Hall hi chu sorkarin a hmanna tur a ngaihtuah dawn a ni.

5. Chief Minister Lalduhoma hian Khatlaa AR ram mawng lam, MINECO bul hnai hi Chief Minister Residence leh CM Office sak nan a dil thin a. CM Office leh Secretariat Building inhlat taka a awm hian sorkar meeting leh programme tam tak hi a kal tluang lo fova. Hun, tha leh sum sen a sang bawk a. MINECO lama CM hmunhma sawn mai hi heng harsatna pumpelhna tha bera ngaih a ni. Tin, Khatlaa AR ram Joint Survey chuan ram chuang (surplus) hi Hectare khat chuang hlek a awm tih a lo hmuchhuak tawh a.

Tun thla February ni 2, 2026 a Chief Minister leh Lt. Gen Vikas Lakhera, DG, AR te inkawmnaah Khatlaa Assam Rifles ram thenkhat, Tuikual veng ep ram, MINECO Main Entrance ep atanga awlsam taka pawh phei theih chu sorkar hnena an hlan theih tur thu Chief Minister a hrilh a. Chak taka bawhzui mek a ni.

6. Aizawl laili laia War Memorial pahnih Canteen kual leh Treasury Square-a mite hi Assam Rifles lam ten Khatlaa an ram chhunga sawn an tum thu tarlan a ni.

7. AR chhuahsan ram china kawngpui tihzauh leh siamthatna tur sum sanction hi tun hnaiah hmuh a ni a. PWD lam ten hna an tan thei thuai dawn nia tarlan a ni.

8. Invitees member Association for Environmental Preservation (ASEP) chuan AR ram chhuahsan ram zau zawk (52.57%) a nihna anga humhalh tura ruahmanna siam a nih avangin Advisory Committee chungah lawmthu an sawi.

9. AR rama thingphuna, ramngaw nuam tak lo siamtu Bethlehem YMA hnenah te, phal taka an ram sorkara hlan lettute hnenah te Advisory Committee chuan lawmthu a sawi nawn a. Committee hminga lawmthu sawina lehkha siam an remti a ni.

Heng bakah hian thil pawimawh dang an sawiho bawk.

Chief Minister hian lungrual taka ram hman dan tur an relho thin avangin Advisory Committee member-te chungah lawmthu a sawi a ni.

Meetingah hian Home Minister K. Sapdanga, Revenue Minister B. Lalchhanzova, SYS Minister Lalnghinglova Hmar bakah Advisory member dangte an tel a ni.