ZALEN May 4, 2026 : Secretariat Adminstration Wing (SAW) Conference Hall-ah vawiin khan Mizoram Sawrkar hotulu Commissioner leh Secretary te thiamna tihpunna tur Capacity Enhancement Training programme neih niin, DP&AR Minister K.Sapdanga’n a hawng a, AI hman tangkai a tul thu a sawi.

Minister chuan officer ten an theihna tihpunna tur training tha tak neih a ni chu lawmawm a tih thu a sawi a. iGOT Karmayogi platform hnuaia online-a zirna buatsaih tha taka an tel thin avang leh Sadhana Saptah (April 2-6, 2026) hnuaiah pawh Mizoram chuan northeast state-te zingah pathumna dinhmun a hauh thei chu officer-ten an thiamna tihpun an duhzia leh hmasawn an tumzia tilangtu a ni, a ti.

K. Sapdanga chuan Secretary te hna chu tunlai sawrkar kalphungah a pawimawh tawh takzet a, sawrkar khalh kaltu ber an nih avangin hmathlir neih that a ngai a. Policy duangtu leh danglamna thlen theitu an ni a, Mizoram hmasawnna atana rorelna fawng pawimawh tak chelhtu an ni. Tunlaiah artificial intelligence chu thil thar a ni tawh lo a. AI hmangin hna a thawh chak theih tawh zawk a. Technology chuan administration a ti awlsam a, hmang thiam tur erawhin mahni inpuahchah a ngai ve thung a ni, a ti.

Viksit Bharat 2047 zulzuia Mizoramin hma a sawn theihna turin officer-ten technology chhuak thar apiang thiam taka an hman ve zel theih a tul, Department hrang hrangten thawhhona tha zawk an neih theihna atan pawimawh a tih thu a sawi.

DP&AR Minister chuan Capacity building awmze nei a kalpui tan theih ani chu lawmawm a tih rualin kal zel se a tih thu a sawi a. Capacity building tih ngat ngat anih chuan chona lo chhuak hmachhawn kawngah officer senior te pawh a pui nasa dawn a, heng programme hi neih zel a ngai dawn a ni.

"Hetih lai hian thutlukna siamna atan erawh mihring chhia leh tha hriatna a la tha bera, tunlai thiamna chu min puitu atan chauh kan hmang tur a ni," a ti. Hetiang programme siam fo tur hian sawrkar chuan hmalak a duh reng thu a sawi bawk.