ZALEN July 18, 2026: Guwahati-a cham mek Tourism Minister Lalnghinglova Hmar chuan vawiin khan Assam Tourism Minister Ajanta Neog chu a chenna inah kawmin tourism hmasawnna kawnga Assam leh Mizoram sawrkar thawhho dan tur a sawipui.

Mizoram Tourism Minister Lalnghinglova Hmar chuan Mizoramin nikum September thla atanga rail connectivtiy a neih hnuah nasa takin khualzin an pung tih a sawi a. “Mizoram tlawhtu khualzin tam zawk hi Assam atanga lo kal an ni. Hei hian tourism kaihhnawihah state pahnihte inkara thawhhona tha zawk neih a tulzia a tilang a, thawhhona nghet zawk kan neih chhoh ngei ka beisei.” a ti.

Assam Tourism Minister hian Mizoram nena thawhona ṭha neih chu Assam duhthusam a nih thu leh, state pahnih tana thil lawmawm a nih thu a lo sawi ve bawk.

State pahnih Tourism Minister-te chuan department kaltlanga thawhhona mumal zawk neih tha an ti a. India rama lang tham tourism-a hmasawnna chak leh langsar nei tur chuan Assam leh Mizoram mai bakah North East state zawng zawng thawhho tlan a pawimawhzia an sawi dun.

Lalnghinglova Hmar chuan Mizoram sawrkarin kumin chhunga tourism event leh festival hmachhawp a neihte Assam Tourism Minister chu hrilhhriain, Mizoram lo tlawh a, festival te hmanpui turin a sawm a. Assam Minister Ajanta Neog pawhin lo zin ngei a tum thu a lo hrilh a ni. 

Langhinglova Hmar hian Guwahati-a event mangament, tourism leh hospitality lama company lian leh langsarte intawhkhawmna, “Imaginarium 2.0- North East Events & Entertainment Leaders' Summit” neih mek chu a hmanpui nghal a. Imaginarium 2.0 July 18-19 chhung Mayfair Spring Valley Resort, Guwahati-ah hman a ni dawn a ni.