ZALEN, Apr. 23, 2025: India rama badminton khelh zirna tha ber pawl, Hyderabad, Telengana-a Pullela Gopichand Badminton Academy (PGBA)-a zir turin Mizo naupang panga an tling thar a, tun thla tawp emaw, thla thar tirah emaw an zawm ang.

Naupang tling tharte hi TATA Trusts, North East Initiative Development Agency (NEIDA), PGBA, Mizoram sorkar leh Mizoram Badminton Association (MBA) thawhhonaa din, Regional Competitive Training Centre (RCTC), Zuangtui-a training mekte an ni a, full sponsorship-in Hyderabad-ah hian an awm dawn a ni.

PGBA-a awm tura thlante hi V. Lalremruata, ECM Vaih, Siaha leh Aizawl mi vek - K. Liansangzela, Ramhlun North; Lalruattluanga Tlau, Salem Veng; Dennis Romawia Rivung, Kanan Veng leh Clement Lalramthlenga, Chanmari West te an ni.

MBA Project Monitoring Committee-a Secretary Prof. Lalhriatzuala chuan Mizo naupang thlan chhuahte hi November leh December thla khan PGBA-ah hian training an nei tawh a, heta an chet that dan avanga thlan an ni tih a sawi.

“An chet that dan leh an nungchang azir ang zela an awm hun chhung pawh pawhsei zel theih a ni ang,” a ti bawk.

RCTC hi PGBA coach, Eddie Lalfelkima leh Lalrinchhana ten an enkawl mek a. Heta awm thei turte hi selection trial paltlanga lak an ni thin a, Inrinni hian lut thar turte lak an ni dawn nghe nghe.

MBA chuan PGBA-a inzir tura thlan chhuah Mizo naupangte hi a chhuang tak zet tih a sawi a. Training tha taka kal thei tur leh Mizoram leh India tihmingthatu ni thei turin duhsakna a hlan bawk.