ZALEN April 26, 2026: All India Adivasi Congress Committee (AIACC), National Executive Member Zodintluanga Ralte chuan BJP kaihhruai NDA sorkar chuan Women’s Reservation chungchang hmaithinghawnga hmangin India political map thlak danglama an party-in hlawkna a neih theihna turin delimitation kalpui a tum a, chu chu eptuten a him lo tiin an dodal mai a ni tih a sawi.

Zodintluanga Ralte chuan, “BJP hian thiam takin Women’s Reservation Bill, kum 2023 daih tawha India rorelna in sang pahnihin a lo pawm tawh chu a nihna anga kalpuia dan siam mai lovin census leh delimitation nen kaihkawpa an hamthatna tura thlawptu a neih tamna state-a Lok Sabha seat tihpun chiam a tum a, hei hi eptu party-ten ram tan a him tawk dawn lo tiin an hnawl a ni,” a ti.

“Hmeichhiate chanvo hmangaih leh ngai pawimawh awm taka lana chumi paha delimitation siam an tum hi politic-a hmalakna tenawm leh thil lungchhiatthlak tak a ni,” a ti.

MPCC adviser chuan, “April thla laihawla parliament pawmpui tura hmeichhe bill leh constitution ammendment siam tuma an hmalakna kha hmeichhe hamthatna tur angin lantir tum viau mah se India mipuiten kan hmu chiang hle a, hmeichhe chanvo tha zawk chu delimitation hmangin a hnungkhirh tlat a, chu chu parliament-ah fing kherek takin constitution ziah danglam an kar ta a, hetianga hmalakna dik lo tak hi eptuten a him kan ti lo va, a hlawhchham ta a, eptu party-te min puh let an tum ta hlauh a ni,” a ti.

“AICC leh Rahul Gandhi-a te hmalakna ka thlawp tlat a, hmeichhiate hamthatna tur tia BJP-in thiam taka an sawi hi lemchanna dik tak a ni a. Prime minister hian politics-a hmeichhe chanvo tha zawk hi duh tak tak ni sela kum 2023-a pass vek tawh hi census leh delimitation chhuanlama hmangin a dang hauh lo vang tih hi ka hmuh dan leh thil awm dan dik tak a ni,” a ti.

"Congress party chuan politics-a hmeichhe dinhmun chawisan piah lamah hnam hnufual zawk - OBC, ST leh SC hmeichhiate hamthatna thlengin a ngaihtuah a, Rahul Gandhi-a’n hmeichhia zawng zawngin an chanvo phu em em an chan theihna tur chuan hnam hnuaihnung leh hnufual zawkte tan he hmeichhe bill-ah pawh hian a hranpaa chanvo bik siamsak a la duh hial zawk a, a nih loh chuan hnam fing leh changkang zawkten heng dinhmun hi an luah zo vek ang a, India ram fanu zawng zawngten an chanvo an luah kim thei dawn lo an ti,” a ti bawk.