ZALEN August 14, 2026: BJP Mizoram chuan FCRA Ammendment Bill chungchanga Union Home Minister hmu-a Mizoram Chief Minister hova palai kal ten Report mumal tak mipui hriat tur a puanna hun an neilo chu a pawi an ti a, minister-in a lo chhan dana lawm tho chunga kawngzawh huaihawt a ni chu pawi an tih thu an sawi.

Vawiin chanchinthar thehdarhtute an kawmnaah BJP Chief Spokesperson Delson Notlia chuan, Church Council of Mizoram General Secretary chu Union Home Minister hmuhna a kal a nih angin, BJP State President hovin August 9, 2026 khan a chenna in ah hmuh thu a sawi a, FCRA Amendment Bill chungchanga an thil thlen te Union Home Minister in tha taka a lo dawn sawn a, an duh anga hma a lak mek lai a, Kawngzawh lo tur a BJP State President hova an ngenna chu Home Minister an hmuh a lungawilohna an neih vang pawh a ni lova, Kawng zawh tur a ruahmanna siam tawh sa thulh leh an hreh vanga an kaltlang pui ta tho kha chu BJP Mizoram chuan pawi an tih thu a sawi.

Rally ni a, kan sakhaw puithiam ten a, FCRA chungchanga thu dik tawk lo an mipuite hnen ah an sawi chu pawi an tih thu a sawi a, FCRA kal tlanga Foreign Donation dawn atang nilova, kan tualchhung sum thawhkhawm hmanga lei leh Biakin, sikul, Building etc te laksak theih tur anga an sawi kha FCRA Ammendment Bill ah hian a lang tel lova, khatiang thu an sawi ta mai kha pawi an tih thu a sawi. Central-a an hotute chuan Mizoram atanga palai kalte nen a thu tha taka an kalpui lai a, kawng an zawh leh ta tho si chu mak an tih thu leh pawi an tih thu an rawn hrilh hial thu a sawi bawk.

BJP Mizoram chuan Sakhaw hruaitu te zahawmna ti bawrhbang zawng a, Mizoram Congress Party ten Political hmanrua atana FCRA an hmang chu pawi an ti a, sawkhaw puithiamte, kohhran hruaitu rilru thianghlim tak tak te Politics tuinu a Congress Party ten hnim an tum hi pawi an tih thu leh hreawm an ti takzet thu an sawi bawk.

Delson Notlia chuan Catholic Bishops Conference of India (CBCI) palai te chuan, an Advisor Mizo Jonathan Lalremruata, kaihhruainain FCRA Bill chungchangah July 10, 2026 khan an ngaihmawh te thlenin Union Home Minister Amit Shah an hmu tawh bawk a ni. Hemi tum hian Amit Shah chuan FCRA Bill 2026 chu Kristian tin zawnna bik a nih loh thu leh National Security tana ti an nih thu te a lo hrilh a, Kristian te tinzawn anih loh zia lanna a lo hrilhin, FCRA kaltlang a India-in Foreign Contribution Kum 2025-2026 (FY) chhungin Rs 17,000 Crore a lo luh thu leh hemi atanga Kristian ten FCRA Fund an dawn ve chu Rs. 3000 Crore (Below 15%) vel chauh a ni a ti. Chuvangin hemi atang ringawt pawh hian Kristiante hrek tumna avanga FCRA Amendment Bill hi tih anih loh zia a lang chiang hle a ni, an ti.

BJP Mizoram chuan July 13, 2026 khan State President Dr K Beichhua, MLA chuan Union Home Minister Amit Shah hnenah ziakin a lo thlen tawh tih an sawi.

August 12, 2026-a Lok Sabha Secretariat-in Foreign Contribution Regulations Act (FCRA) 2026 Joint Parliamentary Commitee (JPC) ah hlan chhawn a a nih tur thu thuchhuah an siam chu BJP Mizoram chuan lawmawm an ti a, Central-a an hruaitu Narendra Modi leh a thawhpui te chungah lawmthu an sawi a, hei hi India rama Kristian pawl hrang hrang ten an ngenna avang a ni tih a chiang hle a ni, an ti bawk.