ZALEN September 21, 2026: BJP Mizoram chuan vawiin khan an state office-ah political session an hmang a, he huna thusawitu Palak bialtu MLA K. Hrahmo chuan Mizoram-ah Uniform Civil Code (UCC) hi hman ve tawh ni se, a ti a, Mizo hmeichhia ten an thatpui a rin thu a sawi. 

Hrahmo chuan, "Mizoram mipui te hian Central-in dan thar a introduce turah Politics thil a inbeihna atan kan hmang fo a, kan hriat chian lem loh te leh kan hriat thiam vak loh vang ten dan thar tur te kan lo hlauvin, kan insawithaih vak thin a, chutih laiin Dan kan duh loh, a hnu a tha leh si te hi kan nei ta nual mai a ni. Chutiangin UCC hi Mizoram ah hian hman ve ngei ni se tih hi vawiin ah hian ka sawi duh a ni."

"UCC hian Tribal te min huam lova, tuna state thenkhat UCC hmang mek te pawhin an State chhunga Tribal te an huam tir lo a ni. 'Engvangin nge UCC chu Mizoram ah kan hman a tulna' tih hi kan ngaihtuah chian a ngai hle a, Mizoram ah hian Non-Tribal hi engemaw zat an awm a, chung Non Tribal awm te chuan nupui pakhat mai ni lo, pahnih pathum te an nei a, chuvangin nupui nei reng chungin Mizo hmeichhia te an rawn nei leh thin a ni. 

"Chung Mizo nupui a nei te chuan an nupui te hmang tangkaiin Sumdawnna (Business) an rawn kal pui a, an Sumdawnna (Business) a tlakchhiat chuan, Mizoram-a an nupui fanau te chu an chhuahsan leh mai thin a ni. UCC danah chuan mi in nupui pakhat chauh a nei thei a, chutih laiin, an lo inthen palh a nih pawhin hmeichhia te tan ro insem chungchangah dan mumal tak a awm bawk a, kan Mizo hmeichhia te Non Tribal te laka kan ven nan he UCC hi kan hman hi a pawimawh hle a ni," a ti.

Hrahmo chuan UCC chu Congress Party ten Politics a hamthatna an duh vangin Mizoram mipui te hnenah a hlauhawm thei ang berin an sawi thin a, chuvang chuan Mizo mipui tam tak chuan UCC hi enge anih an hriat chian hmain an lo hlau em em a ni. Chuvangin UCC hi Tribal State te hian engvanga mamawh zawk nge a nih tih hi ngun taka zirchian a pawimawh a, Mizo hmeichhia te Non-Tribal te laka bum an tawh loh nana venpui na tur pawimawh tak pakhat a nih avangin hman ve a tul hle a ni a ti bawk.