Aizawl: Bible Society of India, Aizawl Auxiliary chuan kum 2016-2017 an target chu Rs. 82,97,800 in an khum a, India ram pumpui report tihchhuah la nilo mahse India rama Auxiliary zingah a sang ber ni tura ngaih an ni. Bible Society of India, Aizawl Auxiliary hian kum 2016-17 (April to March) chhunga sum hmuh an beisei zat (target) chu Rs. 2,80,00,000 niin an hmuh zat chu Rs. 3,62,97,800 a ni a. Kum hmasa 2016 khan Rs. 3,24,89,115 an hmu a, kum hmasa an khumna hi Rs. 38,08,685 a ni. Bible Society of India hian kumin April atang hian rate thar an hmang tan dawn a, rate thar punna hi a san em avangin mi thenkhat ten an sawisel a. Hemi chungchang hi sawi fiahin Aizawl Auxiliary hotute chuan rate thar chu BSI Council in a rel nia sawiin zawm ve tura an ngen avanga zawm ve ta an nih thu an sawi. Bible Society of India, Aizawl Auxiliary thawktute chuan, “Rate thar punna hi a san deuh avangin kan hmuh tlem phah ang tiin tihniam leh turin Council lamah kan ngen a. Rate thar hi nikum lam atanga hman tan tawh tura tih anih laiin awareness neihna atan kan hmang phawt a. Mahse kuminah BSI Council lamin ‘Lo hmang ve hram tawh rawh u,’ tia min ngen avangin hman ve chhin kan tum ta a ni,” an ti a. Pathian rinchhana kal ve rawih mai an rel ta niin Zalen an hrilh bawk. BSI, Aizawl Auxiliary hotute chuan tuna Bible hmanlai Old version leh common language bakah English Standard Version atangin Bible lehlin tumin an inbuatsaih mek tih Zalen palai an hrilh a. Hei hi lehlin zawh a nih hun chuan dialogue Bible (parallel Bible) la siam leh an tum tih an sawi a. Bible lehlin tur atana English Standard Version an thlan chhan chu ‘Saptawnga Bible lehlin tha ber nia an hriat vang’ niin an sawi bawk. BSI Council hian Patron, Life, Annual leh junior member chiah an siam a, mahse BSI Aizawl Auxiliary chuan mipuite harsatna chhawk theih beiseiin Life to Patron, Patron Donor, Life Donor, Bible Missionary, Memorial gift, Anniverssary, Bible a month leh Gospel a day te an siambelh leh a ni.