ZALEN, August 24, 2025: Hyderabad, Telengana-a Badminton World Federation (BWF) Junior Ranking Tournament khelh mek, Kotak India Junior International Series 2025-ah Mizo tleirawl pahnihin medal an la.

Durtlang rawlthar, C. Lalramsanga’n men’s doubles-ah silver medal lain Serchhip tleirawl, Lalrempuii’n women’s doubles-ah bronze medal a la ve thung.

Ramsanga hi Bhavya Chhabra nen tangdunin final-ah Pathianni khan Niranjaan GN Nandakumar leh Yudhajith Reddy Padigepati te lakah 21-17, 14-21, 21-23-a tlawmin silver medal hi an la a ni.

Mission Veng Badminton Club (MBC)-a khel mek, Ramsanga hi October thlaa Thailand-a Yonex-Sunrise BWF World Junior Badminton Championship 2025-a mixed doubles-a India aiawha khel tura tun hnaia invaw tling kha a ni.

Women’s doubles-ah Rempuii hi Zenith Abbigail an inkawp a, qualifying round atanga bul tanin semi final an invaw thleng a. Hetah hian Keerthy Manchala leh Varna Prabu Anand lakah 21-15, 21-14-in tlawm zawkah an tang a, bronze medal an lak a ngai ta a ni.

Inelna hi BWF hriatpui ranking tournament a ni a. Tun karah hian hian Pune-ah BWF ranking tournament hran, level sang zawk, India Junior International Grand Prix 2025 an khelh chhunzawm lehnghal dawn a ni.