ZALEN Feb 5, 2026: Lengpui Land Scam-ah Mizoram sorkar hotute an inhnamhnawih ngei nia a lan avangin MNF party chuan CBI chhuitir tura ngenna Chief Vigilance Officer, Khilli Ram Meena, Chief Secretary ni bawk hnenah vawiin 5.2.2026 khan a thehlut. 

MNF party aiawh hian MNF Legal Board Vice Chairman Lalpianfela Chawngthu, MNF General Secretary ni bawk chuan Indian Airforce te hnena Lengpui ram hralh kawnga Dan bawhchhiatna nasa tak thleng leh cheng vaibelchhe 188 vel zet tih chingpenna thleng chu Mizoram sawrkar thunun theih loh CBI te chhuitir ngei a tul a ni a ti a. Mizoram sawrkarin Dec. ni 28, 2023-ah Mizoram pumpui chu CBI te thuneihna huam chhung (Powers and Jurisdiction area) ah puang zuai mahse, a hnu lawk June ni 27, 2024 ah sut lehin, Central sawrkar hnuaia thawkte chauh chhui phalsak an ni a, Mizoram sawrkar hnuaia thawkte chhui thei tur chuan Mizoram sawrkar phalna lak hmasak zel ngaia dahlet leh a nih avangin, CBI te chhuitir tura hma la nghal theitu chu Mizoram sawrkar a ni a, Mizoram sawkar inkaihhruaina dinglaiah Vigilance Dept. chu CBI hnena thubuai pe theitu anih avangin CBI chhuitir tura ngenna hi Chief Vigilance Officer ni bawk, Chief Secretary hnenah thehluh a ni a ti.

Lalpianfela Chawngthu chuan ZPM Media Committee Chairman hminga CBI a FIR thehluh tumna awm nia sawi chu tlanchhe chunga mipui bum tumna bawk a ni a ti a. Sawrkar kalphung pangngai awm sa (proper channel) hmang ngam lova, ruling party Media Committee Chairman hminga FIR thehluh chu thil kalphung a ni lo a, CBI chhuitir tumna aiin politics thil taka hmai phihfai tumna mai a ni tih mi a nileng lo tan chuan a lang chiang nghal vek a, ZPM sawrkar hian kan lehkha thehluh hi bawhzuiin, sawkar kalphung pangngai (proper channel) ngeia CBI te kuta a hlan kan beisei a, kan umzui zel dawn a ni a ti bawk.

Chief Vigilance Officer hnena CBI chhuitir tura ngenna a thehluhah hian MNF Legal Board Vice Chairman hian Lengpui ram hralh anih dana Dan bawhchhiatna thleng chi hrang hrangte a tarlang a ni.

Lalpianfela Chawngthu hi MNF Legal Board Hruaitute leh MNF Publicity Board hruaitu bakah MNF hruaitu dangten an tawiawm.