ZALEN June 2, 2026: Vawiin khan Central YMA Office ah Central YMA OB te leh Mizoram Kohhran Hruaitute Committee ( MKHC) hruaitute an inkawm a, he hunah hian CYMA hruaitute chuan Kohhran hruaitute chu chibil zawnga hma la lo turin an ngen.

Inkawmhona hi Central YMA President R. Lalngheta chuan a kaihruai a, YMA in Ruihhlo Do kum a puan mekah Kohhran nena tanlakho dan tur sawiho a ni a. Kohhran ten Ruihhlo leh a kaihhnawih do kawngah theihtawp chhuahin hma an la mek hlawm a, ruihhlo in thalaite nun leh chhungkua a khawih nasat avangin tuna hma lakna theuh bakah uar leh zuala hmalak a tul thu sawiho a ni. Hemi pual hian Kohhran tinah thupui pakhat hmanga tawngtairual buatsaih turin Central YMA hruaitute hian an ngen. 

Kohhran tin ten lehkha pawimawh leh Baptisma Certificate an pek chhuah thinah fimkhur zawka kal pui a tul thu sawi ho a ni a, a bikin khua leh tui ni lote hnenah pek fimkhur turin Central YMA hruaitute hian an ngen bawk. 

Nikuma YMA Inkhawmpui Lianin a rel angin, “Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA in hma la rawh se” tih chungchangah Central YMA hruaitute chuan Kohhran tin te hnenah Chibil zawnga hma la lo tura ngenna a lo siam tawh angin chibil hmalakna a reh theihna tura theihtawp chhuah pui turin an ngen bawk. 

Inkawmnaah hian MKHC atangin Chairman, Rev John Raldosanga, Synod Moderator leh Office Bearer dang mi 6 an tel a, Central YMA atangin President leh a thawhpuite an tel.