ZALEN July 8, 2026: Mizo Zirlai Pawl (MZP) chuan Chief Electoral Officer Garima Gupta, IAS-in Special Intensive Revision (SIR) 2026 kal mek Press conference a neih tuma mihring pun dan pangai (abnormal growth) baka punna a awm lo tih a sawi chu dik tawk lova an hriat thu an sawi.

MZP chuan vawiina an Pisa-a chanchinbumite an kawmnaah Draft Electoral Roll thar chu ngun taka an zirchian thu an sawi a, a bikin chhim lama Chakma tamna khuate punna chu a sang hle an ti a, Sumasumy khua, 2005-a vote 52 awmnaah chuan draft roll hnuhnungberah vote 248 an awm tawh a, a punna hi 376.92% a ni, an ti. Heng khua bakah hian 200% aia vote pun tamna hi khaw 7 awmin, 100% aia tama vote punna hi khaw 16 a awm niin an sawi.

Khaw 95 an zirchianna atangin 50% aia vote pun tamna hi khaw 30 chuang a awm an ti a, Mizo tamna khua apiangah vote punna percent hi a hniam a, heng khuaah te hi chuan 10% - 20% bak a pung lo niin an sawi.

MZP chuan Chief Electoral Officer Garima Gupta, IAS chu Special Intensive Revision (SIR) 2026 kalpui mekah ngaihtuahna a seng tawk lova an ngaih thu an sawi a, office a luahlum tawk lo tiin roll buaipui fel a nih hma chu a hna hi tha taka vil turin an phut thu an sawi.

MZP chuan MLA bial pangaah mapping an ti tha tawk lo tih an sawi a, July ni 4 atanga August ni 4 inkara vote nei thei lo te hming paih leh inthunthar duh leh leh siamthat (Claims & Objections) tih huna hearing neih turah ERO, AERO leh BLO te chu fimkhur taka hma la turin an ngen a, YLA leh Chakma zirlaite nen pawh hemi vil tur hian an thawkho dawn tih an sawi bawk.