ZALEN September 19, 2026: Congress MLA hlui Nihar Kanti Chakma chuan Tlabung chu Chakma te khaw hlun (Homeland) leh 1898-a British rorelna hnuaia rin luh a nih hma chuan Chittagong Hill Tract-a bet anga a sawi chungchangah ngaihdam a dil.

Nihar Kanti Chakma chuan a phone-ah Artificial Intelligence (AI) hman tangkai tumin a inzir a, a phone hmanga a thil ziah sual chu thil pawi tak a nih thu a sawi a, hetah hian Tlabung chu Chakma te khaw hlun ang hian a sawi a, British rorelna hnuaia Mizoram a awm hma phei kha chuan helai hmun hi Chittagong Hill Tract-ah betin Chakma te luah chin ram niin a tarlang a ni.

Tlabung YMA chuan hemi chungchangah hian thupha chawi tura an tih angin thupha pawh a lo chawi tawh a, boruak pawh a dai tawh a, hetihlai hian All India Chakma Student Union te chuan a thusawi behchhan hian thuchhuah an lo siam leh a, hei hi a hriatpuina a nih loh thu a sawi.

Nihar Kanti Chakma chuan Tlabung Welfare, Aizawl te chu September 10, 2026 khan len chilhin Press Conference kova ngaihdam dil tura an ngenna angin vawiin hian Aizawl Press Club-ah press conference hi a ko ta tih a sawi a. Heng zawng zawng lo thlen chhan chu amah vang a nih thu a sawi a, a thupha chawina chu Tlabung khawtlang leh Welfare ten an pawm sak theih chuan a lawm hle tur thu a sawi.