ZALEN July 9, 2026: Chamdur-I Presbyterian Biak In chei that hna thawk mektu (sub contractor) Labiakzuala, Thingsai, Hnahthial district, tuna Salem Veng Aizawl-a cheng mek suam a nih dan chhui mekah Mizoram Police te chuan he insuamna hi finfiah a la ni lo a, uluk leh ngawrh takin chhui zui zel an tum.

July ni 7, 2026 khan Lalbiakzuala hi Bolisora-a mamawh lam tura a kal haw lam chu Chamdur 'P', Lawngtlai District daiah tu tih hriat loh ralthuam keng mi pariatin an lo suam thu Police-in an dawng a. Misualte kuttuartu Lalbiakzuala sawi danin, heng mite hi ramhnuai atanga lo chhuakin amah hi an dap a, a lo tan deuh avangin silai kawmin an chhu a, rakzu fun nga leh pawisa ₹600 laksakin an tlanbo a. A sawisatu zinga mi pathumte chuan AK rifle kengin midangte hian ulhbun bakah tualchher silai an keng niin a sawi a ni.

Ruah sur a chawlh loh avang leh kawng chhia avangin Police te chuan tualchhung NGO hruaitute awm laiin Lalbiakzuala hi video call hmangin thu an zawt fiah a. Hetah hian a sawisatute chuan thawmhnaw hring dal hain, boot an bun deuh vek a, an sam a sei a, "Shanti" tih thumal an lam ngun hle niin a sawi.

YMA-te ngenna angin, a tuartu hi Primary Health Centre-ah Medical examination tih a ni a, endiktu Health Worker te chuan a taksaah hliam hmuh theih, duk emaw pilh emaw engmah a awm loh thu an report a ni.

July ni 8, 2026 khan Vasei Police Station atangin Officer-in-Charge hovin Chamdur 'P'-ah hian kalin chipchiar takin thil awmdan chhui zui a. Thil thlenna hmun nia sawi pawh tlawh niin, a tuartu leh he thil kaihhnawiha thuhretu hrang hrangte thu zawh fiah an nih bakah, finfiah zel a ni a. Rinhlelhawm deuh te pawh thu zawh fiah niin heng mite erawh hi chu an inhnamhnawih lo nia hriat chhawm leh a ni.

Chhui zui zelna atangin a tuartu (Lalbiakzuala) hian mi dang kaltlangin Bolisora-a mi hi zu a lei ngei tih finfiah a ni a. Hemi hnua zu lei belh tura Bolisora-a a kal nawn leh nia a insawi erawh a zuartute chuan an hriatpui loh thu leh hemi hun lai vel hian lo lamah hna an thawk a, tu hnenah mah zu an hralh loh thu an sawi.

Chhui chian a nih hnu hian a tuartu Lalbiakzuala thu leh a hmuna awm thuhretute sawi dan thil inmil lo a awm nual tih hriat a ni a. A chhungkhat hnai tak pakhat hnen atangin amah hi zuin a tihbuai leh zu in nasa a ni tih hriat a ni a, Police leh NGO ten an zawh fiah lai te pawh hian a thawhpui that duh loh bakah tum hnih ngawt tlan bo a tum niin sawi a ni.

A tuartu thusawi inmil tawk lo nia lang te, kut tawrhna hliam hmuh tur awm lo te, thuhretute thil sawi dan nena inpersan tak tak thil a awm avang leh thil chhui tawh chin atang hian he insuamna hi tun thleng chuan finfiah loh a la ni. Police te chuan uluk leh ngawrh takin he thil hi chhui zui zel an tum.