ZALEN August 12, 2026 : Vawiin chawhma dar 10 vel khan tui dahkhawlna tanky-ah Vanlalpeka (39) leh Ramengmawia (33) an thi.

ZALEN thudawn danin vawiin khan Champhai Tlangsam Vengah Vanlalpeka leh Vannunmawia chu tanky tifai turin an inhlawh a, a lut hmasa zawk Vanlalpeka chu a luh rualin a tlu nghal a. Vannunmawia leh a bul hnaia hnathawk Ramengmawia leh Lalhmingthanga te chu chhanchhuak turin an lut ve nghal a ni.

Nikhaw hre lovin Vanlalpeka, Ramengmawia leh Vannunmawia-te chu an awm a, Damdawi in panpui nghal ni mah se, Vanlalpeka leh Lalengmawia chu chhan theih an ni tawh lo a ni.

Tanky hi Feet 7 vela thuk niin feet 2 vel tui a tling a. Chhanchhuah hna thawktute chuan Tanky chhungah hian boruak hip tur a awm lo a, a rimchhe hle niin an sawi.

Vanlalpeka hi zaninah lumen tur niin naktuk chawhma dar 11 ah vui tur a ni a, Ramengmawia hi an khua Chalrang panpui niin zaninah lumen tur a ni a, a vui hun tur hi chanchin buatsaihlai hian hriat theih ala nilo.