ZALEN May 19, 2026 : Tuirial Secondary Collection Centre (SCC), Tuirial Airfield-ah vawiin khan Sawhthing Flag Off Programme neih a ni a. Dr. KC Lalmalsawmzauva, Adviser to CM (Handholding) chuan thu sawiin sawhthing hi a vai liam a, he hunah hian Chemical fertilizer hmang lote sawhthing chauh sawrkarin a buaipui hun a la thlen tur thu a sawi.

Dr. KC Lalmalsawmzuava chuan SCC hruaitute, PCC leh DAMC lama hruaitute, MAMB lama a thawhpuite bakah CEO, Handholding leh Aizawl East huam chhunga party mi te, Media lamte chungah lawm thu sawiin, Tuirial SCC hruaituten hetiang programme duan nachang an hria chu lawmawm a tih thu a sawi a. He SCC atanga kumin atana batch hnuhnung ber tur vai liam a ni thei leh a rate thu-ah pawh Rs.51/- a tih ral theih a ni tur chu lawmawm a tih thu a sawi.

Sawhthing chu an sawrkar tirh atangin kalphung nei thlapin an kalpui tih a sawi a, First Phase (2024-2025) khan insiamrem kuma kalpui niin, 2026-2026 hi Second Phase tur niin, a sawngbawlna uar kum (Year of Processing & Value addition) kumin leh nakkum chhovah a tam thei ang ber a processing leh value addition kalpui tum a nih thu a sawi.

Dr. KC Malsawmzauva chuan Third Phase (2027-2028) chu hmun ngheta chin leh Organic uar zawka kalpui (Year of Sustainable Cultivation and Organic/Natural Farming) tur a nih thu a sawi a, Mizoram hi Organic State nih tuma hmalak mek a ni a, chemical fertilizer hmang lote sawhthing chauh sawrkarin a buaipui hun a la thleng dawn a ti.

Adviser to CM chuan, "Sawhthing avangin ram chhung leh pawnah hriat kan hlawh ve ta. Kan sawhthing te Cachar, Bagha leh Siliguri vela tawp thin khan Mumbai, Delhi, Punjab, Kolkata, Odhisa, Andra Pradesh leh Foreign ram te a thleng ve ta. Niti Aayog chuan Mizoram chu Ginger Capital of India-ah a puang ta a. Nikum leh kumina kan experience atang chuan sawhthing demand awm tak tak hun chu April thla chawhnu lam a ni.

"Phai khaw lum lam thar a zo chho tan vang a ni. Tun tuma a rate up chhan pakhat chu May 27-a Id lo awm tur inbuatsaihna vang leh India ram hmun danga thar a tlem tak deuh vanga ni pakhat a. State tam tak ten sawrkar back-up-tu an neih ve loh avangin an farmer ten nikuma a rate hniam avang khan an ching tam ngam lo, keini erawh kan vannei a ni," a ti.

"Kumina kan harsatna ber chu a rate awm har lutuk leh sawrkarin kan la har deuh anga lang bakah, a rate a tirah kan tuk sang lutuk kha a ni. Chu vangin, Farmer ten a chawh leh a lin a inrual a, farmer-te calendar a buai. Mahse, demand awm hun hi April thla chawhnu lam a ni miau si," tiin, demand awm laia supply thei tura inbuatsaih a ngaih thu a sawi bawk.