ZALEN June 16, 2026 : Tun hnaia Chhinga Veng leh Dawrpui inkara ramri chungchanga inhriatthiamlohna thleng chungchangah Chhinga Veng Thalai Pawl (CVTP) chuan vawiin khan thuchhuah an siam a, hma an lak chhante an tarlang a, an veng humhim tur hian hma an lak zel tur thu an sawi.

CVTP chuan, "Tun hmain ramri buai kan neih kan hre ngai lo a, Electric Veng Sakawrpului atanga Bazar pan chhohna atanga ABC lane hi pi leh pu atanga Chhinga Veng chhung a ni a, kum 2020-2021 Covid len lai khan helai area ah hian Dawrpui lamin dawr in khar tura hriattirna lehkha an rawn sem a, Chhinga Vengin an veng chhung a nih avangin dawr in hawng turin an hrilh ve leh a ni.' tiin an thuchhuahah chuan an tarlang a ni.

Chhinga Veng Local Council leh NGOs te chuan Kum 2025 kum tawp lam khan Chhinga Veng chhunga dan phalloh a sumdawngte titawp turin hma an la a, vai sumdawng tam tak pawh tih tawp tir an ni a, March 2026 khan Dawrpui Local Council chuan ABC lane a awmte chu Dawrpui Veng hming lanna Sign board tar turin an hriattir tawh bawk tih an thuchhuah-ah hian tarlang a ni.

An thuchhuaha an insawifiah dan chuan YMA Day ni 15.6.2026 zing khan Dawrpui hnatlang chuan Chhinga Veng chhungah an hnatlang a, tawngkamin Chhinga Veng KTP leh YMA building te chu ‘Dawrpui Venga awm in ni e’ tiin an sawi a. He thil hi hrethiam loin Chhinga veng thalaite chuan an che chhuak ta a niin Chhinga Veng chuan an thuchhuah siamah an tarlang a ni.

Chhinga Veng chuan an veng chu Aizawl a veng hlun tak zing ami a tih sawiin1912 ah Pi Phiri m/o Rev. R. Lalengkima te pawh awm tawhin 1932 ah phei chuan in 25 a ding tawh a niin an sawi a. AN veng indan dan chungchang sawifiahin Dawrpui Veng atanga indang ni loin, Kohhran erawh chu Dawrpui Kohhran atanga indang a ni. Chuvangin an veng humhim tur hian Chhinga Veng Thalai Pawl chuan hma an la zel dawn a tih thuchhuah hmang hian an sawi bawk.

Chhinga Veng Thalai hnatlang thenkhatin tukina an Veng chhunga Armed Veng Kohhran Thalai hoarding tar an lo la thla palh chu pawi an ti a, ngaihdam dilin an tar leh tawh thu an sawi bawk.