November 15, 2023; Kum 10 liam ta, November ni 15, 2013 zingkar atangin Chi (Salt) avang dawn tih thu a thang a, engnge thleng zui kan la hre hlawm ang chu maw...vawiin hi a kum 10 na champha a ni.

Kha thil thleng kha Mizoram history a thil thleng chhinchhiah reng tawh tur, ngaihtuah let a nuihzatthlak ang reng tak, a hunlai ngaihtuah chuan manganthlak ang reng tak kha a ni a, khami ni a Chi lei tur a intlar leh lei hnem hman viau nih te pawh kha a lehlam zawng a ngaihtuah chuan tih awm tak a ni ve tho mai, 'Chi' tello a khawsak a harsat tur zia ngaihtuah chuan...

Kum 10 kal ta vawiin ni ang, November ni 15, 2013 zingkar atangin Mizoram hmun hrang hrangah Chi a vang dawn nia sawi a awm thut avangin mipuite an chi-ai nasa hle a, dawr hrang hranga Chi lei tur awm te pawh a man pangngai aia sanga hralh te a ni hlawm chungin mipui ten an inchuh zo nghal vek a, dawr thenkhat ah phei chuan Chi lei tur hi an intlar hial nghe nghe a ni.

Hetiang thuthang a awm hnu hian Chi vang tur thuthang chu thu diklo a ni tih finfiah zui a ni a, zingkar lam a mipui chi-ai na chu tun thleng a sawizui hlawh, history rau rau a, history hlimawm a ni zui ta a nih hi. November ni 15 hi 'Kan hlim Ni' tih vuah a mawi a ni e...!