ZALEN March 19, 2026: Mizo Zirlai Pawl (MZP) leh Thangram Indegenous People Movement (TIPM) buatsaih, Thangram Cultural Meet "Unau kan Ni" tih thupui hmanga March ni 18-19 chhunga Ronpur a neih-ah, vawiin chawhma dar 10:30 khan Chief Minister Lalduhoma chu Khuallian niin hun a hmanpui a, Sanghmingthanga, Vice President MZP kaihhruainain hun hi hman a ni.

Khuallian Chief Minister chuan, "History kan en chuan Cachar phaia khawsa hmasate chu Biate leh Hrangkhol te an ni a. Thangram pawh hi AD 1490 velah Ranglong, Sakechep, Hrangkhol, Molsom, Chorei leh Kaipeng hnamten an lo luah tawh a. British an lo lian a, an inkarah indonate a lo awm a. Vawiin a Thangram kan han tih bik Langkaih phai leh Singla phai mel 180 biala zau hi kum 1867 khan ramri kham fel tak neiin British leh kan pipute khan inremna an siam ta a ni," a ti.

Lalduhoma chuan, "Inpumkhatna lama hmalakna kawngah Thangram mipuite in thawhhlawk hle a. In unau, tanpui ngaite tana vehbur in khawn dan te, Press Release siama in unaute thlavang in rawn hauh thin dan te pawh kan lo hre ve zel a. In chungah Mizoram mipuite pawh kan lawm a ni. Kan hnam huikhawmtu lian leh tangkai YMA te, MZP te leh kohhran te, kan tlawmngaipawl dangte kaltlangin nghet takin invuan tawn zel ang u," tiin tanrualpuiah a sawm.

Chief Minister chuan, "Zofate huikhawm a, a tul anga tanpui zel hi kan sawrkar duh dan leh kal dan a ni a. Khawvel huapa kan inhuikhawmna tur Mizo Diaspora Cell chu CM office-ah kan din tawh a. Hna pawh an thawk nasa a, mi tam tak an tanpui tawh a ni. Chutiang rilru putu sawrkar chuan Thangrama kan unaute pawh hi a ngaihthah ngai lo vang che u. In tana dan hnuaia tih theih kan neih te chu kan ti zel dawn a. Fahrahin kan kalsan lo vang che u," a ti.

Tun hnaiah kan thenawma Zofate delh chin ramah harsatna a thleng hlawm a. Heng, kan chunga harsatna lo thleng te hi Pathian remruatna anga lo thleng, kan thatna tura a rawn tirh a ni lovang tih kan sawi thei lo. Engkim ti thei kan Pathianin hna a thawh chuan, theih loh reng reng hi a awm lo a ni. Chuvang chuan, a malsawmna kan dawn theih nan, “A ram leh a felna” zawng zel ang u.

Tin, MZP thupui, “Tanrual hi chakna” tih hi chatuanin a dik reng dawn a. Tangrual tlat ang u" a ti.

He hunah hian MZP President Dr. C. Lalremruata chuan thu sawiin, “Thangram a zofa awm hnam peng hrang hrang Chorei, Sakachep, Hrangkhawl, Ranglong, Molsom Leh Kaipeng te hi in inlungrual a in tanrual a tul takzet a, Politics-ah pawh hlauhawm tham ni tura thu khat vua a in awm a tul takzet a ni," a ti. Pathian-in Hnam-ah min din a, zofate hi rorelna pakhat hnuaiah la awm hi MZP chuan a ring tlat a, chumi tur chuan awmna hmun theuh ah tawngtaia dilin lungrual a ngaih thu a sawi.

Thangram Indigenous Peoples Movement President K. Vana Chorei pawhin thusawiin, "Mizoram Chief Minister meuhin kan ram a rawn tlawh hi a ropui a, hetiang taka ram hruaitu lianin min tlawh hi kan la hre ngai lo. Kan ram tana ni chhinchhiahtlak a tling. Tunah chuan kan chhehvela hnam dangte pawhin nu leh pa kan nei a ni tih min hmuhpui ta a ni," a ti a. "Mizoram mipuite hian hetah in fate kan awm a ni tih hi min rawn hre reng rawh u," a ti bawk. 

He hunah hian, MZP Gen Hqr. Adviser F. Lalnienga chuan thu sawiin, Thlenkim Zan March ni 18, 2026 (Nilaini) Khan MZP Gen Hqr. Peter Adviser Lalzawmliana chuan fuihna thu a lo sawi tawh bawk a ni.

Zanin March Ni 19, 2026 (Ningani) zan hian Art & Culture Dept changtu Minister C. Lalsawivunga chu Khuallian niin hun a hmanpui ang a, Lalmuanpuia Punte, Adviser to CM (Political) chu Khualzahawm niin hun an hmanpui dawn a ni.