ZALEN, July 09, 2026: China khawpui, Beijing-a foreign sponsorship quota-a taekwondo zir paha lehkha zira awm mek Mizo player pahnih zinga pakhat, Vanlalhmangaihzuali chuan 17th Beijing Taekwondo Super League, One Horse First Cup-ah gold medal a la.

Capital University of Physical Education & Sports-a inzir mek, New Diakkawn, Koladib nula hi China-a a awm hnua inelnaa a inlanna hmasa ber niin June 21-a neih inelnaah hian Senior Category Under 30 inelna huangah a inlan a ni.

Hmangaihi hi Mizoram Amatuer Taekwondo Association (MATA) player a ni a. Kolasib Taekwondo Club atanga zir chhuak niin Goa National Games leh National Senior Championship-ah pawh Mizoram tan gold medal lo la tawh a ni.

June, 2024-a Aizawla Mizoram sorkarin Mizoram Sports Conclave a buatsaih atangin Hmangaihi hi Joseph Vanlalpeka, Armed Veng South, Aizawl nen China-a taekwondo zirna tur hi an hmu a, lehkha an zir tel nghal bawk.

An inzirna hi foreign sponsorship quota a ni a. China atanga Mizoram Sports Conclave chhimtu, Grand Master Kim Hee-do leh Grand Master Lee Jeong Hee ten Mizoram Olympic 2036 Vision a hlawhtlinna tura an buaipui atangin sum tumtu hi hmuh a ni. 

Sponsorship hmuh a niha MATA-in dilna a hawn khan diltu eng emaw zat atangin grand master-ten tehfung chi hrang hranga endikin Hmangaihi leh Joseph-a te hi thlan an ni.

Beijing-ah hian ram dang atanga China-a zirte kalphung ang thovin kum khat chhung tawng (Mandarin) an zir phawt a, hemi chhung hian taekwondo an zir tel nghal a. Kum khat hnuah hian Bachelor of Arts (BA) an zir chhunzawm a ni.