ZALEN March 30, 2026: Conservation Mizoram chuan Zawlsei khaw lo hal naa Chinghnia (Asiatic Wild Dog/ Dhole) 8 kah anih thu leh a thi 6 hmuh a nih thu social media platform hrang hranga thlalak nen a darh chiam mai hi pawi an ti a, hetiang anga nungchate chunga hleilenna hi thleng nawn tawhlo se an ti. 

Hemi chungchangah hian Conservation Mizoram chuan thil awmdan a ngaihven reng a, dan bawhchhia hrem ngai an awm ngei niin a lang an ti a, hremna lekkawh ni ngei se an ti a; thuneitute hmalakna pawh an ngaichang a, a tul anga puibawm tur pawhin an inring reng an ti.

Conservation Mizoram chuan Chinghnia te hi nungchate in eichhawnnaah hmun pawimawh tak luah an ni a, khawvel huap pawha mang mai hlauhawm hnai tak (Endangered species) annih bakah Indian Wildlife (Protection) Act 1972 leh he dan ennawn thar zelah pawh a bik taka humhalh lai (Schedule II) an ni a, an chunga hleilenna leh diriamna thlalak leh thuziaka lo lang te hi enliam mai lova a tul ang ngeia dan bawhchhetu te hrem turin thuneitu te an phut a ni.

Conservation Mizoram chuan, "Kan rama sial leh bawng vulh dan kalhmang pawh felfai zawk leh ramsate chenna tibuai lo (overgraze leh soil erosion) zawnga kalpui anih theih nan ran vulha eizawngte leh sawrkar lama a mawhphurtu te pawh awmze neia hma la ngei turin kan ngen a. Kan ran vulh lai ramhnuaia chhuah zalen ten nungchate kut an tawrh changa thungrulhna (retaliatory killing) thleng thin pumpelh nan leh kan ram humhalh nan heihi a mawhphurtu ten ngaipawimawh ngei se tiin kan ngen a ni. Tin, ramsa ten mihring huan-thlai leh ran vulh te a tihchhiat/tihhlum changa zangnadawmna hmuh theih dan inzirtirna te neiin hemi lama thawktu te pawhin taima taka an hna te thawk thin turin kan ngen bawk a ni," an ti.