ZALEN August 21, 2026 : Vawiinah khan ZO Reunification Organisation (ZORO) ten Chittagong Hill Tracts chu Chakma ten anmahni ram ngei anga an sawi chu an hrethiam lo tiin thuchhuah an siam.

ZORO chuan India rama Chakma hnam hruaitute chuan Bangladesh ram chhunga Chittagong Hill Tracts chu India ramah behtir an duh thu leh hemi chungchang hi International Court of Justice (ICJ) ah thlen an tum tih an hriat thu an tarlang.

Chakma hnam hruaitute chuan August ni 17, 1947-a Chittagong chu Pakistan rama behtir a ni chu “Chakma Black Day” anga an ngaih thu pawh an sawi a. Hemi chungchangah hian ZORO chuan Chittagong Hill Tracts hi Chakma ten an ram anga an sawi hi an pawm theih loh thu an sawi.

ZORO chuan, “Chittagong Hill Tracts a ram neitu leh a luah hmasa bertute chu Zofate kan ni,” tiin an sawi.

An thuchhuahah chuan British sawrkarin Chittagong Hill Tracts-ah bu an khuar hma zawng khan khu ram chu zalen ram niin, ram dang thu hnuaiah awm loin, anmahniin ro an rel a, Lal an neih tawh thu pawh an sawi a ni.

Chakma te erawh chu hun hnuhnung zawkah hmun dang atanga Chittagong Hill Tracts-ah rawn pem lut ve chauh an ni tih ZORO chuan an sawi bawk.

Chittagong Hill Tracts hi pi leh pu atanga Zofate ram a nih thu ZORO chuan an puang nawn leh a ni.