Aizawl: Sericulture Department-in North East Region Textiles Promotion Scheme kaltlanga hma lakna thar tur an neih Integrated Muga Silk Development Project chu Zirtawp zan khan Thuampuiah Chief Minister in a hawng. Chief Minister chuan Muga silk thatna hmun leh a hmunpui bera ngaih Assam chu sik leh sa inthlak danglamin a tihbuai nasat avangin an muga siamchhuah zat chu nasa takin a tlak hniam thu a sawi a. Hei hi Silk lama mithiam ten zirchiangin 2012 leh 2013 khan Nagaland leh Mizoram ah te muga enchhin nan hmalakna an nei a, he pilot project ah hian tlang ramah nipui laiin muga pangang ten cocoon an siam tha thei bik tih hmuh-chhuah anih thusawiin hemi avang hian sawrkar laipui chuan NERTPS kaltlangin sericulture atana zau zawka hma lak a rel ta niin a sawi. CM chuan NERTPS hnuaia remchannate chu hmang tangkaia sum leh pai lakluh nana hmangthiam turin kuthnathawktute a ngen bawk. Sericulture Department hian NERTPS hnuaia Project pahnih Integrated Sericulture Development Project (ISDP-NERTPS) leh Intensive Bivoltine Sericulture Development Project (IBSDP-NERTPS) an kalpui mek a, tuna Project thar kalpui tur hi IMSDP-NERTPS a ni a, hemi atan hian cheng nuai 1352.09 ruahman a ni. ISDP-NERTPS ah khan cheng nuai 3249.20 ruahman niin beneficiaries 600 an awm a. IBSDP-NERTPS atan cheng nuai 3014.16 ruahman a niin beneficiaries 1000 an awm a, project thar  IMSDP-NERTPS hian beneficiaries 500 tuam beisei a ni. NLUP leh hmalakna dang kaltlangin sericulture farmers 2954 te hi tuam an lo ni tawh bawk a ni. Project thar hawn zawh hian silk puan tihlar nan silk hmanga Mizo puan tah leh silh leh fen dangte phochhuahna Silk Couture tih hman nghal a ni a. Mizo designer pathum Lucy Sailo (Lucy’s Catalogue), Charlie Mathlena (Heritage Mizoram) leh Laltanpuii (Zozia Silk, Tlangnuam) te silk puan kutchhuak pholan a ni.