ZALEN March 22, 2026 : December 2025 thlengin Progress Partner mi 2255 te hnenah Chief Minister Special Package pek a ni tawh a, hemi atana pawisa pek chhuah zat chu a vaiin Rs. Vbc. 18.33 a tling.

Assembly budget session neih zawh taka member te zawhna Planning & Programme Implementation Department changtu, chief minister Lalduhoma'n ziaka a chhan danin, chief minister Special Package hi kum 2026 chhunga pek chhuah tum zat bithliah a awm loa, dilna lut atangin hmu tlaka ngaihte Implementing Department-in endikin, pek tlaka a ngaihte chu Apex Body-ah a thlen a, Apex Body hian lo enfiah ve lehin, pek tlaka a ngaihte hnenah tanpuina sum hi a tahtawla pek zel tum a ni.

CM Special Package hi “Guidelines for Handholding Support to Progress Partners Phase-ll sub Para 3.2.2, sub Para 6.3.2 leh Para 6.2” in a sawi angin sawrkar-in a kalpui.

Dilna hi India khua leh tui, Mizoram a khawsa nghet, sawrkar hnathawk lai ni lo, mahni eizawnna kawnga ti tak takte tan dil theih a ni. Eizawnna kawng zawh mek, hawhtlinpui tura ti tak tak mi, puih tlaka Implementing Department-in a ngaih te tan dawn thei a ni a. Chutiang mi, ZPM mi leh sa ni lo tan pawh guidelines-in a sawi angin CM Special Package hi dawn theih a ni.