ZALEN July 17, 2026 : Vawiinah khan Land Resources, Soil & Water Conservation Department Director Vanlalmuanpuia Chhangte chuan Aizawl Press Club-ah chanchinbumite kawmin Chief Minister's Rubber Mission (CMRM) an kalpui dan hrang hrangte a sawi fiah.

Director chuan CMRM chu kum 5 chhung kalpui tur a nih thu sawiin, Phase-I kalpui tawhin Mamit leh Kolasib District-ah khaw 24-ah rubber tiak 4,50,000 phun tawh a ni a. Kumin Phase-II (2026) ah District 8 chhunga khaw 117-ah kuthnathawktu mi 2,580 te hnenah rubber tiak 11,92,050 phun belh leh turin hma lak mek a nih thu a sawi.

Kuthnathawktu thlanbik progress partner te hi kum 4 chhung sawrkarin an rubber chinte hi a enkawl zui dawn a, an hmalakna te endik a nih hnuah an hnathawh tawh mil zela tanpuina pek tur a ni a, rubber tiak dawng si, phun duh lo emaw, midang hnena hralh chhawng emaw te chu progress partner an nihna hlih a ni ang a, tanpuina pek chhunzawm an nih loh tur thu a sawi a. Press mite zawhna chhangin Phase-1 an kalpui tawhah chuan rubber tiak phun duh lo emaw, hralh ru emaw report an la dawn loh thu Vanlalmuanpuia Chhangte chuan a sawi.

Tanpuina hi Direct Benefit Transfer (DBT) hmangin progress partner-te bank account-ah pek chhuah tur a ni a, pawisa faia pek loh chi te chu a "kind" a pek an ni ang a. Kumin chhung hian rubber herna khawl set 100 subsidy-in sem chhuah a ni bawk ang a ti.

Kum 2027-ah Phase-III kalpui leh turin tunah hian rubber ching duh tur zawnna (survey) neih mek a ni a. A duh apiang tan mahni District theuha Land Resources, Soil & Water Conservation Department-ah dilna a theh luh theih reng a ni a ti bawk.