ZALEN, August 05, 2025: Mizoram college hrang hrang pakuaa zirlai 29 inlanna tur, MZP & MSBA Inter College 9 Ball Pool Championship 2025 chu Nilaini atang hian khelh tan a ni dawn.

Inrinni thleng awh tur inelna hi MZP leh Mizoram Snooker & Billiards Association (MSBA) buatsaih niin MSBA Hall, Hawla Indoor Stadium, Republic Vengthlang, Aizawlah khelh a ni dawn a. A tel tur zingah hian hmeichhia panga an tel nghe nghe.

Intihsiakna tel tura hming pete hi MBSA chuan an practice nan an hmunhma hawnsakin zirlaite hi hun eng emaw chen inbuatsaihin hun an hmang tawh hlawm.

Championship-a tel turte hi Aizawl atangin Govt Aizawl College, Govt Aizawl North College, Govt Hrangbana College, Govt J Thankima College, Govt Mizoram Law College, Mizoram Christian College, NIELIT Aizawl leh Pachhunga University College (PUC) bakah Lunglei atangin Lunglei Government College an ni.

PUC atanga tel tur tam berin zirlai pakua (mipa pasarih leh hmeichhia pahnih) an inlan dawn a, Govt Aizawl College atangin paruk (mipa pali leh hmeichhia pahnih) leh Govt Mizoram Law College atangin zirlai pali (mipa pathum leh hmeichhia pakhat) an tel bawk ang.

Hmeichhe player hi college pathum - Govt Mizoram Law College atangin pakhat, Govt Aizawl College leh PUC atangin pahnih ve ve an tel a ni.

Inelna hi knockout-a khelh tur niin mi mal (single) leh team (double)-in an khel dawn a. Explore Mizoram Youtube channel-ah live-a pek chhuah a ni ang.