ZALEN April 12, 2026: Congress party chuan Mizoram pawn damdawi in rate to zawka MR bill theih a nih laia Mizoram chhung private damdawi ina a bill theih loh chu mipuite zah lohna leh hnam dang duhsaknaah an ngai tih an sawi.

Nimin khan Aizawl Press Club-ah chanchinbu mite kawmin MPCC hruaitu, Joseph Lalhimpuia chuan, “MNF sawrkar khan health care a ngaihthah em em a, bill a tang rei bawk a. MNF kha health care-ah an hlawhchham,” a ti a. Health care-a inziah luh chungchang sawiin, “Congress sawrkar laia inziah luh man Rs. 200 leh Rs. 500 kha ZPM sawrkarah chuan general Rs. 2,500, semi cabin Rs. 5,000 leh cabin Rs. 10,000 a ni hem mai a, mipuite hi sawrkar hian sumdawn nan min hmang em ni kan ti hial a. Mi rethei golden card hmangtute, sum tam tak senga inziak lutten kan hospital neih that kan pan theih nan private hospital-te hi empanelled-ah dah ve thuai turin kan phut a ni,” a ti.

Joseph Lalhimpuia chuan sawrkarin damdawi in hrang hrang nena an inremna a thup tlat chu mak a tih thu sawiin, “He thilah hian puanhnuai thil, mipuite hriattir an phal loh thil a inphumru niin a lang a; chuvangin, bihchian a tul tak zet a. RTI hmanga zawhna leh assembly session-ah pawh an pe chhuak thei lo a. Hospital nena thawhhona hi mipui pawisa thawhkhawm hmanga kalpui a nih avangin an thup tlat hi dan kalh a ni,” a ti bawk.