ZALEN July 10, 2026 : Congress party chuan vawiin khan Congress Bhavan-a Golden Hall ah 'Political Session' nn nei a. He huna thu sawitu MPCC PAC member TT Zothansanga, Ex-MLA chuan an party-in restricted tender an pawngsual ve ngai loh thu a sawi. 

TT Zothansanga chuan, "Congress sawrkarin a tulah chauh Restricted tender kan kal pui a, ngaimawh tham a awm lo. Public-ah pawh sawi a awm lo tluk a ni a, restricted tender kan pawngsual ve lo," a ti.

MPCC PAC member chuan MNF-in an rawn uar hle a, PWD leh Sports Deptt. ah chauh pawh Rs 8,62,12,49,814/- restricted tender an inpe a, CM chhungte pahnih – Kamrula leh Zoramchhana te (Rs. 1,37,15,35,820 + Rs 74,75,98,928) chuan Rs 2,11,91,34,748/- zet duhsakna uchuak an hmu a ni.

Tuna CM hian MNF te khan Restricted Tender inpekah Dan 5 an bawhchhiaa sawiin, he Corruption tobul hi an tih ve loh tur thu vawi duai lo a sawi a. Restricted tender hi ZPM hnuaiah hriat a nih tawh loh tur thu a sawi a ni. Manifesto-ah te hial an dah a, Dan kalh a nih thu te, Contractor-te chauhin Contract hna an thawh tawh tur thu te, Restricted Tender an la tih ve dawn loh avanga sum dinhmun siam that a nih tur thu te a sawi a ni.

An han tling a, kar lovah Consultancy Firm 328 an Empanelled nghal a. CM kal tlang chauhva RT leh Departmental hna thawk turin Order te a chhuak ta a. SASCI sum Rs. Vbc. 629.17 leh 328 = (Rs. 957.17 Cr) Blanket Approval-in CM-in a pe vat a, hei hi Mizoram contract hna a World Record a ni. CM kaltlangin hna 135 Rs 986.71 Crore (Vbc zakua sawmriat paruk leh nuai 71) an inpe tawh a ti.

Deptt. lian (CM chan tel lovin) 14 vel zirchian neiin, a dang Deptt. 15 chuang zir rih loh a ni a, zirchian chinah restricted tender a hna pek - Rs. 46,36,98,57,130/- leh departmental a hna inpek - Rs. 9,10,64,75,461/-, a vaiin - Rs. 55,47,63,32,591/- niin a sawi.

Restricted Tender-a hnam dang pek, Mizote thawh theih a awm teuh niin TT Zothansanga chuan a sawi a, Sawma pakhat pe ve lo turte hetia duhsak hi a zia lo. Hna 16 zinga 8 chu awlsam taka Mizo thawh theih pangngai a ni, a ti.