ZALEN, October 20, 2025: Cricket Association of Mizoram (CAM) chuan season thar intan mek, 2025-26 chhungin khelmual hrang hrang siam, sak leh cheibawl nan Rs. nuai 1,585 an dah.

CAM rorelna sang ber, Annual General Meeting vawi 7-na chu Inrinni khan Mizoram State Sports Council (MSSC) Conference Room, Hawla Indoor Stadium, Aizawlah neih niin season thara budget tur pharha pawm a ni.

2025-26 chhung hian sum hmanna tur leh hman tur Rs. 28,50,00,000 (cheng nuai 2,850) an ruahman a. Heng zinga a zahve aia tam, Rs. 15,85,24,000 chu Mizoram hmun hrang hranga khelmual an neih leh an sak mek cheibawla sak chhunzawm nan leh tuaihnum nan an dah.

CAM-in khelmual pangngai a neih chhun ni mek, Suaka Cricket Ground (SCG) sak chhunzawm zel nan Rs. 50,00,000 an ruahman a. Heng sumte hi pavillion building thar, hostel leh club sak nan bakah khelmual enkawl zuina tura tih a ni.

SCG hi a hmun petu, Lal Rotluanga pa hming chawia a hming hi phuah a ni a. Kum 2010 khan a sakna tur lung phum niin DoNER ministry atanga Rs Vbc 11 hmuh hmanga bul tan a ni a, inkhelh theihna peih a nih hnuah May 23, 2014 khan CAM kuta hlan niin tun thlengin a tihchangtlun hna hi thawh niin hma a sawn zel.

Season liam ta (2024-25) pawh khan CAM chuan Sihhmuia khelmual thuam thar zelna atan hian Rs. Vbc 17.5 a ruahman a ni.

SCG bakah hian CAM hian Aizawla Tanhrila khelmual thar tur an buaipui meka hman tur leh Lungleia siam nan Rs. 20,24,000 an dah bawk a. Hei bakah hian Joint YMA Field, Vaivakawna inkhelh a tul changa khelh theih tura cheibawl nan Rs. 15,00,000 an ruahman bawk.

CAM Annual General Meeting-ah hian kum 2025-28 chhunga an hruaitu tur an thlang bawk.

CAM HRUAITU THARTE:

President: Robert Lalfamkima, Ramhlun North (Representative of Ramhlun Venglai CC)

Vice President - Lalrosanga, Bawngkawn South (Representative of Bawngkawn South CC)

Secretary: Lalfakawma Varte, Bawngkawn West (Representative of Lily Veng CC)

Joint Secretary: Lalrinawma Chhangte, Dawrpui (Representative of Venghnuai Raiders CC)

Treasurer: R Lalnunsiama, Chanmari (Representative of Chanmarians CC)

Councillor: Lalbiakfela, Zemabawk (Representative of Zemabawk Pitchers CC)